डुम्रे बचत तथा ऋण सहकारीको अध्यक्षमा पिया
डुम्रे : तनहुँको बन्दीपुर गाउँपालिका–१ डुम्रेबजारस्थित डुम्रे बचत तथा ऋण सहकारी संस्थाको वार्षिक साधारण सभा र छैटौं निर्वाचनबाट आगामि चार वर्षका लागि नयाँ कार्यसमिति चयन गरिएको छ ।
सहकारीको छैठौं निर्वाचनबाट राम कुमार पियाको नेतृत्वमा ११ सदस्यीय नयाँ कार्यसमिति चयन गरिएको छ। नयाँ कार्यसमिति आगामी चार वर्षका लागि सहकारीको जिम्मेवारी सम्हाल्ने छ ।
उक्त कार्यक्रममा ज्येष्ठ नागरिक सदस्य अजय नारायण पिया, अध्यक्ष राम कुमार पिया, बन्दीपुर गाउँपालिका–१ का वडा अध्यक्ष शिवकुमार श्रेष्ठ र कानुनी सल्लाहकार ऋषिराम अधिकारी लगायतले शुभकामना मन्तव्य व्यक्त गरेका थिए।
सहकारीले आर्थिक वर्ष २०८०/०८१ मा १७ करोड ६० लाख ८९ हजार १४५ रुपैयाँको कारोबार गर्दै १९ लाख ८४ हजार ८८० रुपैयाँ नाफा कमाएको जानकारी दिइयो ।
सहकारीमा २ हजार ६३८ जना सेयर सदस्य रहेका छन्। यस अवसरमा उत्कृष्ट र नियमित बचत तथा ऋण कारोबार गर्ने ५ जना सदस्यलाई पुरस्कृत गरिएको थियो। साथै, ९० वर्षका ज्येष्ठ नागरिक सदस्य दधिराज विक र भिमप्रसाद श्रेष्ठलाई सम्मानित गरिएको छ ।
सहकारीका अध्यक्ष राम कुमार पियाले आगामी दिनमा सदस्य र समुदायको हितलाई मध्यनजर राखी आर्थिक सुशासनका मूल्य मान्यताहरूको पालन गर्दै संस्थाको कार्य संचालन गर्ने प्रतिवद्धता व्यक्त गरेका छन् ।
