फूलखेतीबाट आँवुखैरेनीका किसानले ११ लाख रुपैयाँ कमाए, झरीले २५ प्रतिशत फूलमा क्षति

तनहुँ : तनहुँको आँबुखैरेनी गाउँपालिकाका महिलाले फुर्सदको समयलाई आम्दानीको अवसरमा बदल्दै सयपत्री फूलखेतीबाट उदाहरणीय सफलता हासिल गरेका छन् । घरायसी कामबाट बचेको समय सामाजिक सञ्जालमा बिताउने प्रवृत्तिलाई उद्यमसँग जोड्ने प्रयासस्वरूप सुरु गरिएको सामूहिक फूलखेतीले अहिले महिलालाई आर्थिक रूपमा सबल बनाउनुका साथै गाउँमै रोजगारीको अवसर सिर्जना गरेको छ ।

आँबुखैरेनी गाउँपालिका–१ आँधीमूल यान्चोकटारका ४५ जना महिला तीन वर्षदेखि सामूहिक रूपमा फूलखेतीमा सक्रिय छन् । सामान्य प्रयासबाट सुरु भएको उनीहरूको उद्यम अहिले ४५ रोपनी क्षेत्रफलमा फैलिएको छ । यस वर्ष तिहारलाई लक्षित गरी उत्पादन गरिएको सयपत्री फूल र मालाको बिक्रीबाट यान्चोकटार महिला समूहले मात्रै १० लाख रुपैयाँ आम्दानी गरेको छ । गाउँपालिकाको वडा नं. २ र ३ का किसानले समेत फूल बिक्रीबाट एक लाख रुपैयाँ बराबरको कारोबार गरेका छन् ।

यसरी गाउँपालिकाभित्रका महिला समूह र किसानले यस वर्ष फूल तथा माला बिक्रीबाट कुल ११ लाख रुपैयाँ बराबरको कारोबार गरेको गाउँपालिकाको कृषि शाखाले जनाएको छ । थोरै समय र सामूहिक श्रमबाट सुरु भएको प्रयासले व्यावसायिक रूप लिन थालेपछि महिलामा खेती विस्तार गर्ने उत्साह पनि बढेको छ ।

महिला समूहकी अध्यक्ष सुन्तली गुरुङले स्थानीय महिलालाई सामूहिक उद्यममा जोड्दै आयआर्जनको अवसर सिर्जना गर्ने उद्देश्यले फूलखेती सुरु गरिएको बताइन् । समूहमा आबद्ध महिलाले खेतमा फूल लगाउनेदेखि गोडमेल, फूल टिप्ने, माला उन्ने र बजारमा बिक्री गर्नेसम्मका काम आफैँ गर्दै आएका छन् ।

उनका अनुसार यस वर्ष फूलको माग राम्रो भएकाले उत्पादनले बजार पाएको छ । स्थानीयस्तरमै फूल उत्पादन हुन थालेपछि तिहारका लागि बाहिरबाट फूल ल्याउनुपर्ने अवस्था पनि कम हुँदै गएको छ । बजारको माग र बिक्रीबाट प्राप्त आम्दानीले महिलालाई थप उत्साहित बनाएको भन्दै उनले आगामी दिनमा खेती विस्तार गर्ने योजना रहेको सुनाइन् ।

आँबुखैरेनी गाउँपालिकाकी उपाध्यक्ष दुर्गा अर्यालले महिलाको फुर्सदको समयलाई उत्पादन र उद्यमसँग जोड्न सके आर्थिक आत्मनिर्भरता बढाउन सकिने बताइन । सामाजिक सञ्जालमा समय बिताउनुको सट्टा सामूहिक उद्यममा आबद्ध हुँदा महिलाले आफ्नै श्रम र सीपबाट आम्दानी गर्न सक्ने उनको भनाइ छ ।

उपाध्यक्ष अर्यालले भनिन्, ‘महिलाले घरायसी कामबाट बचेको समयलाई सदुपयोग गरेर फूलखेतीमार्फत आम्दानी गर्न थाल्नुभएको छ । यसले महिलाको आर्थिक अवस्थामा सुधार ल्याउनुका साथै उद्यमशीलता विकास गर्न पनि सहयोग पु¥याएको छ ।’

गाउँपालिकाका अध्यक्ष शुक्र चुमानले स्थानीय महिलाले उत्पादन गरेको फूलले बजार पाउन थालेपछि गाउँमै फूलखेतीको सम्भावना बढेको बताए । स्थानीय उत्पादनलाई प्रोत्साहन गर्दा किसानको आम्दानी बढ्नुका साथै तिहारमा बाहिरबाट फूल आयात गर्नुपर्ने निर्भरता घट्ने उनको भनाइ छ ।

यस वर्ष मौसमको प्रतिकूलताले भने फूलखेतीमा केही असर गरेको छ । गाउँपालिकाका कृषि तथा पशु शाखा प्रमुख सन्तोष केसीका अनुसार गत कात्तिक १३ र १४ गते परेको वर्षाले सयपत्री फूलखेतीमा करिब २५ प्रतिशत क्षति पु¥याएको थियो । प्रतिकूल मौसमका बाबजुद पनि स्थानीय महिला समूह र किसानको सक्रियताले उत्पादन तथा बिक्री सन्तोषजनक रहेको उनले बताए ।

गाउँमै उत्पादन, गाउँकै श्रम र स्थानीय बजारको मागलाई जोडेर अघि बढेको आँबुखैरेनीको फूलखेतीले सामूहिक उद्यममार्फत ग्रामीण महिलाको आर्थिक सशक्तीकरण सम्भव छ भन्ने देखाएको छ । तिहारमा घर सजाउने र भाइटीकामा प्रयोग हुने फूल उत्पादनबाट सुरु भएको यो अभियान अब महिलाको आयआर्जन र व्यावसायिक पहिचान निर्माण गर्ने माध्यमसमेत बन्दै गएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर