तनहुँको व्यासमा १० सहित ११ जना कोरोना संक्रमित थपिए, एक जनाको मृत्यु
- भञ्ज्याङ समाचारदाता (दमौली)
तनहुँमा आज ११ जना नयाँ कोरोना संक्रमित थपिएका छन् भने एक जनाको मृत्यु भएको छ । स्वास्थ्य निर्देशनालयले सार्वजनिक गरेको विवरणमा व्यास नगरपालिकाका १० जना र ठेगाना नखुलेकी एक २४ वर्षीया महिलामा कोरोना संक्रमण पुष्टि भएको छ ।
संक्रमित महिला पोखरा स्वास्थ्य विज्ञान प्रतिष्ठानको फिभर क्लिनिकबाट पहिचान भएकी हुन । उनि प्रतिष्ठानको प्रि-आइसोलेसनमा बसेकी छिन ।
यस्तै, सार्वजनिक विवरण अनुसार व्यास-१ का ४३, ३१ वर्षीय पुरुष र १७ वर्षीया महिलामा कोरोना संक्रमण भएको छ ।
व्यास-२ का ३८ वर्षीय पुरुष, व्यास-५ का ३२ वर्षीय पुरुष, व्यास-४ का १० वर्षीय बालक र व्यास-४ कै ५, ६१, ३० र १३ वर्षीया महिलामा कोरोना संक्रमण भएको स्वास्थ्य निर्देशक डा. विनोद विन्दु शर्माले जानकारी गराएका छन् । संक्रमित सबै कन्ट्याक्ट ट्रसिङबाट पहिचान भएका हुन् ।
६५ वर्षीय पुरुषको मृत्यु
तनहुँको ब्यास नगरपालिका-३ का ६५ वर्षीय पुरुषको उपचारका क्रममा मृत्यु भएको छ । गण्डकी मेडिकल कलेज, पोखराको भेन्टिलेटरमा उपचारका क्रममा आज दिउँसो ११:५० बजे मृत्यु भएको स्वास्थ्य निर्देशनालय जनाएको छ ।
मृतक पुरुषमा कोरोनाको संक्रमणका साथै मधुमेह र उच्च रक्तचापको समस्या रहेको बताइएको छ । यी सहित कोरोना संक्रमणबाट मृत्यु हुनेको संख्या तनहुँमा ९ जना पुगेको छ ।
