व्यास–१ जलेश्वर महादेव मन्दिरमा श्रीमद्भागवत सप्ताह ज्ञान महायज्ञ
दमौली : तनहुँको व्यास नगरपालिका–१ रतौलीस्थित जलेश्वर महादेव मन्दिरलाई धार्मिक पर्यटकीय स्थलका रूपमा विकास गर्ने उद्देश्यले श्रीमद्भागवत सप्ताह ज्ञान महायज्ञ आयोजना गरिएको छ । रतौली टोल विकास संस्थाले विहीबार एक कार्यक्रम आयोजना गरी ‘पितृ मोक्ष धनधान्याञ्चल श्रीमद्भागवत सप्ताह ज्ञान महायज्ञ तथा धार्मिक महोत्सव’ औपचारिक रूपमा सार्वजनिक गरेको हो ।
संस्थाका अध्यक्ष तथा महायज्ञ मूल संयोजक अभिमानसिं बस्नेतका अनुसार मन्दिर परिसरमा ८० देखि १०० जनासम्म भक्तजन बस्न सक्ने सुविधा सम्पन्न बहुउद्देश्यीय धर्मशाला निर्माणको योजना अघि बढाइएको छ । उनले भने, “जलेश्वर महादेवको मूर्ति स्तरीकरणसँगै होम कुण्ड र शिवलिङ्ग कुण्ड निर्माण गरी मन्दिर परिसरलाई धार्मिक पर्यटनको आकर्षण केन्द्र बनाउने लक्ष्य राखिएको छ।”
रतौली टोल विकास संस्थाको आयोजनामा सिर्जना आमा समूह र जलेश्वर मन्दिर संरक्षण समितिको सहआयोजनामा हुने महायज्ञ आगामी मंसिर ६ गतेदेखि १३ गतेसम्म सञ्चालन हुनेछ। यस अवसरमा पण्डित कपिलदेव भट्टले कथा वाचन गर्नेछन् । महायज्ञबाट रु. दुईदेखि पाँच करोड रुपैयाँ संकलन गर्ने लक्ष्य आयोजक समितिले जनाएको छ। प्राप्त रकमबाट धर्मशाला निर्माण तथा मन्दिर क्षेत्रको पूर्वाधार विकासमा लगानी गरिनेछ ।
छाब्दी बाराही, बेदव्यास लगायतका नजिकैका धार्मिकस्थलमा आउने भक्तजनलाई खाना र बस्न सहज होस् भन्ने उद्देश्यले धर्मशाला निर्माण गरिँदैछ। “दमौली र आसपासका धार्मिक स्थलहरूलाई एकीकृत गरी धार्मिक पर्यटन वृत्त विकास गर्न सकिन्छ”, व्यास नगर प्राज्ञ प्रतिष्ठानका सदस्य देवीबहादुर बस्नेतले बताए ।
प्रचार–प्रसार समितिका संयोजक दीपक बस्नेतका अनुसार, महायज्ञ दीर्घकालीन धार्मिक तथा पर्यटकीय विकास योजनाअन्तर्गत आयोजना गरिएको हो । महायज्ञकोको शुभारम्भ मंसिर ६ गते बिहान कलशयात्रा पश्चात् दिउँसो ११ बजे हुने कार्यक्रम तय गरिएको छ। प्रत्येक दिन बिहान ११ बजेदेखि दिउँसो ४ बजेसम्म कथा वाचन, नाटक र राष्ट्रिय कलाकारहरूको भजन–कीर्तन प्रस्तुति रहनेछ ।
व्यास–१ का वडासदस्य मणिजंग बस्नेतले महायज्ञलाई सफल बनाउन टोलवासी सबै सक्रिय रूपमा सहभागी हुनुपर्नेमा जोड दिए । उनका अनुसार, वडाकार्यालय र व्यास नगरपालिका कार्यालयबाट पनि आवश्यक सहयोगका लागि पहल गरिएको छ ।
कार्यक्रममा जलेश्वर महादेव मन्दिर संरक्षण समितिकी कार्यवाहक अध्यक्ष विमला आले, सिर्जना आमा समूहकी अध्यक्ष माया बस्ताकोटी, समूहकी निवर्तमान अध्यक्ष हरिमाया दरै लगायतले महायज्ञको तयारी तथा सफलतासँग सम्बन्धित धारणा राखेका थिए । कार्यक्रम सञ्चालन टोल संस्थाका सचिव जयराम अधिकारीले गरे ।
