बन्दीपुरको देवीथुम्का सामुदायिक वनमा वृक्षारोपण
बन्दीपुर : सगरमाथा वृक्षारोपण महाअभियान–२०८३ अन्तर्गत तनहुँको बन्दीपुर गाउँपालिका–३ शेराटारस्थित देवीथुम्का सामुदायिक वन उपभोक्ता समूहको वन क्षेत्रमा वृक्षारोपण गरिएको छ । भू तथा जलाधार व्यवस्थापन कार्यालय, तनहुँ र देवीथुम्का सामुदायिक वन उपभोक्ता समूहको आयोजना तथा डिभिजन वन कार्यालय, तनहुँको सहकार्यमा बुधबार विभिन्न जातका विरुवा रोपण गरिएको हो ।
बन्दीपुर गाउँपालिका–३ का वडाध्यक्ष परमेश्वर भट्टराई, समूहका अध्यक्ष हरिप्रसाद भट्टराई, भू तथा जलाधार व्यवस्थापन कार्यालय, तनहुँका प्रमुख दिवाकर पौडेल लगायतले सगरमाथा वृक्षारोपण महाअभियानको पृष्ठभूमि, वन संरक्षण तथा वृक्षारोपणको आवश्यकता र यसको दीर्घकालीन महत्वका विषयमा चर्चा गरेका थिए। सहभागिहरुले रोपिएका बिरुवाको संरक्षणलाई अभियानको सफलताको मुख्य आधार भएको उल्लेख गर्दै सबैलाई संरक्षणमा सक्रिय हुन आग्रह गरेका थिए ।
समूहका अध्यक्ष हरिप्रसाद भट्टराईले झाडी फाँडेर वृक्षारोपणका लागि उपयुक्त वातावरण तयार गर्न निकै मेहनत गरिएको उल्लेख गर्दै रोपिएका बिरुवाको संरक्षणमा पनि उत्तिकै प्रतिबद्धताका साथ लाग्ने बताए ।
समूहका सदस्य विश्वेश्वर भट्टराईले सञ्चालन गरेको कार्यक्रममा समूहका पदाधिकारी, सदस्य, वन उपभोक्ता महासंघका जिल्ला प्रतिनिधि, पालिका महासंघका प्रतिनिधि तथा आयोजक कार्यालयका कर्मचारीहरूको सहभागिता रहेको थियो ।
कार्यक्रमअन्तर्गत चाँप, अमला, राइखन्यु, चिउरीलगायत विभिन्न जातका १५० भन्दा बढी बिरुवा रोपिएको छ । यस आर्थिक वर्षभित्र उक्त वन क्षेत्रमा कुल तीन हजार तीन सय बिरुवा रोप्ने लक्ष्य राखिएको छ । साथै थप पाँच सय बाँसका बिरुवा रोप्ने योजना रहेको कार्यालय प्रमुख पौडेलले जानकारी दिए । बाँस रोपणका लागि आवश्यक सहयोग भू तथा जलाधार व्यवस्थापन कार्यालय, तनहुँले उपलब्ध गराउने उनले बताए ।
वृक्षारोपणका लागि आवश्यक सबै बिरुवा डिभिजन वन कार्यालय, तनहुँ र भू तथा जलाधार व्यवस्थापन कार्यालय, तनहुँबाट निःशुल्क उपलब्ध गराइएको आयोजकले जनाएको छ ।
