दमौली कारागारमा कैदीबन्दीबीच झडप, रातारात २५ जनालाई स्थान्तरण गरियो
भञ्ज्याङ न्यूज
दमौली कारागारमा कैदीबन्दीको नाइके नियुक्तिको विषयलाई लिएर आइतबार साँझ दुइ समुह बिच झडप भएको छ । उक्त झडपको क्रममा कैदीबन्दीका नाइके सहित ६ जना घाइते भएका छन्।
कैदीबन्दीहरुबीच विवाद उत्पन्न भई झडपको अवस्था सृजना भएपछि तनहुँ प्रशासनले २५ जना कैदीबन्दीलाई रातारात अन्यत्र स्थान्तरण गरेको छ ।
झडपमा संलग्नलाई सुरक्षा जोखिमका कारण स्थानान्तरण गर्ने निर्णय भएको निमित्त जेलर नारायण अधिकारीले जानकारी गराए । प्रमुख जिल्ला अधिकारी सागर आचार्य, प्रहरी उपरीक्षक अरुण पौडेलसहित कारागारमा आइतबार अबेरसम्म बसेको सुरक्षा अधिकारीको बैठक पछि उनीहरुलाई स्थानान्तरण गर्ने निर्णय गरिएको थियो ।
कारागारको नयाँ भवनमा सरुवा भएर आएका पाल्पा, काठमाडौंसहित विभिन्न ठाउँका कैदीबन्दी र रैथाने समूह आपसमा भिडेका थिए । नाइके नियुक्तिमा विवाद सृजना भए यता कैदीबन्दी दुइ समूहमा विभाजित भएको बताइएको छ ।
त्यही विवादका कारण आईतबार झडप भएको बताइएको छ । झडपमा परी घाइते भएकालाई दमौली अस्पतालमा उपचार पश्चात पुनः कारागार लगिएको छ । घाइते हुने सबैको टाउकोमा चोट लागेको छ । बाँस, कराइ लगायतका वस्तुले आफुहरु माथि आक्रमण भएको घाइते कैदी नाइके धनबहादुर शाहीले बताए । गत कात्तिकमा स्थानान्तरण भएर आएका नयाँ कैदीबन्दीको समूह भित्रिए यता त्यहाँ गुटबन्दी भएको स्रोतले बताएको छ ।
