पृथ्वीराजमार्गको घाँसीकुवा-विमलनगर खण्ड चैत्र १२ गतेसम्म दैनिक ४ घण्टा बन्द हुने
भञ्ज्याङ न्यूज
पृथ्वीराजमार्ग अन्तर्गत तनहुँको घाँसीकुवादेखि विमलनगर सडक खण्ड थप १५ दिन बन्द गरिने भएको छ । मुग्लिन-पोखरा सडक विस्तार आयोजनाको पूर्वी खण्ड अन्तर्गत घाँसीकुवादेखि विमलनगर खण्डमा मर्मतका लागि रातीको समयमा ४ घण्टा राजमार्ग बन्द गरिने भएको हो ।
सहायक प्रमुख जिल्ला अधिकारी काशी राम गैरेले आज शुक्रबार एक सूचना जारी गर्दै फागुन १८ देखि २७ गतेसम्म राती १२ देखि बिहान ४ बजेसम्म बन्द हुँदै आएको यो खण्ड पुनः १५ दिन फागुन २८ देखि चैत्र १२ गतेसम्म बन्द गरी सडकको भित्तो काट्ने काम गरिने जानकारी गराएका छन् ।
उक्त समयसम्म अत्यावश्यक सवारी साधान बाहेक अन्य सवारी साधनहरु पूर्ण रुपमा बन्द गरी काम गर्ने भनि जिल्ला सुरक्षा समितिको बैठबाट निर्णय भएको उनले जानकारी गराए ।
सहायक प्रजिअ गैरेले भने, ‘राजमार्ग बन्द नहुँदा सवारी साधन सञ्चालन भइरहने र कामलाई गति दिन नसकिएको हुँदा रातको समयमा राजमार्ग बन्द गरी कामलाई तीव्रता दिने तयारी गरिएको छ ।’ यस अगाडि १० दिनका लागि बाटो बन्द गर्ने निर्णय भएकोमा पुनः १५ दिन थप गरिएको उनले बताए ।
मुग्लिन पोखरा सडक विस्तार आयोजना अन्तर्गत तनहुँमा दुइ वटा खण्ड विभाजन गरी काम भइरहेको छ । आँबुखैरेनीदेखि जामुनेसम्म पूर्वी खण्ड र जामुनेदेखि पोखरासम्म पञ्चिम खण्डमा सडक विस्तारका काम भइरहेका छन् । सडक सीमाभित्र रहेका विद्युत् पोलहरु स्थानतरण नगरिदा कामले गति लिन नसकेको आयोजनाले बताउने गरेको छ ।
