आँवुखैरेनी अस्पतालद्वारा एक वर्षमा ११७ जनालाई प्रसूति सेवा प्रदान
तनहुँको आँबुखैरेनी गाउँपालिकाले सञ्चालन गरेको आँबुखैरेनी अस्पतालले एक वर्षको अवधिमा ११७ जनालाई प्रसूति सेवा प्रदान गरेको छ । वि.सं. २०८० मंसिर १ गतेदेखि २०८१ मंसिर १ गतेसम्म अस्पतालले ११७ महिलालाई प्रसूति सेवा दिएको हो ।
अस्पतालका प्रमुख डा डिबी क्षेत्रीले अस्पतालले स्थानीय र आसपासका महिलालाई सुरक्षित प्रसूति सेवा प्रदान गरेको जानकारी दिए । उनका अनुसार अस्पतालबाट ९९३ जनाको आकस्मिक अवस्थाका बिरामीको उपचार गरिएको छ भने ३२ हजार नौ पटक प्रयोगशाला परीक्षण गरिएको छ ।
अस्पतालमा ९९१ बिरामीलाई भर्ना गरी उपचार गरिएको छ भने तीन हजार ९ जनालाई अल्ट्रासाउण्ड सेवा प्रदान गरिएको डा. क्षेत्रीले जानकारी गराए । त्यस्तै एक्स–रे सेवा तीन हजार ३९१ जनालाई प्रदान गरिएको छ ।
स्वास्थ्यचौकीका रुपमा रहेको आँबुखैरेनी स्वास्थ्यचौकीलाई वि.सं. २०७९ मंसिर १ गते अस्पतालका रुपमा स्तरोन्नति गरिएको थियो । अस्पतालले अब छिट्टै शल्यक्रिया सेवा, दन्त सेवा, फिजियोथेरापी आवश्यक बिरामीको पुनःस्थापना र उपचार सेवा सुरु गर्न लागिएको अस्पतालले जनाएको छ ।
यस्तै, विशेषज्ञ चिकित्सकमार्फत थप सेवा, टेलिमेडिसिन तथा मोबाइल स्वास्थ्य शिविर सञ्चालन गर्ने योजना रहेको डा क्षेत्रीले बताए । उनले भने, ‘स्वास्थ्यचौकीबाट अस्पताल भएको दुई वर्षको अवधिसम्म अस्पतालले विभिन्न सेवा विस्तार गरिसकेको र केही सेवा थप गर्ने लक्ष्यमा पुगिएको छ’
गाउँपालिकाले वि.सं. २०७९ मंसिर १ गतेदेखि आँबुखैरेनी स्वास्थ्यचौकीलाई स्तरोन्नति गरी १५ शय्याको अस्पताल सञ्चालन गरेको हो । अस्पतालले तनहुँको आँबुखैरेनीका अलवा जिल्लाकै बन्दीपुर, गोरखाको पालुङटार, सहिद लखन र चितवनको इच्छाकामनाका जनतालाई सेवा दिइरहेको अस्पताल व्यवस्थापन समितिका अध्यक्ष एवं गाउँपालिकाका अध्यक्ष शुक्र चुमानले बताए ।
अस्पतालबाट चौबिसै घण्टा आकस्मिक सेवा, आधारभूत प्रयोगशाला, एक्स–रे, भिडियो एक्स–रे, इसिजी, फार्मेसीलगायत सेवा प्रदान गरिएको छ । अस्पतालमा एक जना एमडिजीपी, तीन जना मेडिकल अधिकृत र १३ नर्स कार्यरत छन् ।
‘गाउँपालिकाले पुरानै भवनको उपयोग गरी अस्पताल सञ्चालन गरी सर्वसाधारणलाई सहज रुपमा उपचार सेवा प्रवाह गर्दै आएको छ । वडा कार्यालय भवन, गाउँपालिकाको सभाहल उपयोग गरी अस्पताल बनाइएको छ’, गाउँपालिकाका अध्यक्ष चुमानले भने, ‘स्वास्थ्यचौकीलाई ओपिडी बनाएर सञ्चालन गरेका छौँ, इलाका वनको भवनलाई ल्याब बनाएका छौँ, त्यसमा फार्मेसी र शौचालयको पूर्वाधार थप गरेका छौँ ।’
