मेयर उम्मेदवार जोशी माथी आक्रमण, रिस्तीमा पुनः मतदान गर्न माग, मतगणनामा सहभागी नहुने

तनहुँको व्यास नगरपालिकाको मेयर पदका उम्मेदवार दीपकराज जोशी माथी आक्रमण गरिएको छ । व्यास नगरपालिका-८ रिस्ती स्थित साविक गाविस भवनमा कायम गरिएको मतदान केन्द्र निरीक्षणका लागि पुगेका उम्मेदवार जोशी माथि आक्रमण गरिएको हो ।

मतदान केन्द्रमा रहेका कांग्रेस कार्यकर्ताको आक्रमणबाट घाइते मेयरका उम्मेदवार जोशीलाई उद्धार गरी दमौली अस्पतालमा उपचारका लागि ल्याइएको थियो । थप उपचारका लागि काठमाडौं लग्ने तयारी गरिएपनि मौसमको खराबीका कारण त्यो सम्भव नभएपछि उनलाई शुक्रबार साँझ पोखरा लगिएको छ ।

नेपाली कांग्रेसका वरिष्ठ नेता रामचन्द्र पौडेलको गाउँमा आफूलाई मार्ने प्रयास भएको उम्मेदवार जोशीले बताएका छन् । मतदान कार्यको निरीक्षणका लागि मतदान केन्द्रमा पुग्दा आफु माथि ढुंगा र धारिलो हतियारबाट आक्रमण गरेको उनले बताएका छन् ।

मतदानस्थलमा एजेन्ट किन छैन भनेर मतदान अधिकृतसँग सोध्दा आफूमाथि एकैचोटि हमला भएको जोशीले बताए । उनले भने, ‘बहुदलीय व्यवस्थामा वरिष्ठ नेताको गाउँमा मलाई मार्ने प्रयास भयो, यो कार्यको म भर्त्सना गर्दछु ।’

यस्तै, नेकपा एमाले र गोविन्दराज जोशी समूहले व्यास नगरपालिका-८ रिस्तीमा पुनः मतदान गर्न माग गरेका छन् । नेकपा एमाले तनहुँका सचिव राजेश्वर ढकाल र गोविन्दराज जोशी समूहका तर्फाट हरिशरण पण्डितले शुक्रबार साँझ प्रेस विज्ञप्ती र्सार्वजनिक गरी गाविस भवन फेदीमा भएको मतदान स्थल (क) र (ख) केन्द्रमा भएको मतदान प्रक्रिया स्थगन गरी पुनः भयरहित वातावरणमा मतदान गर्न माग गरेका हुन् ।

मतदानका क्रममा भएका प्रक्रियाहरु छानबिन गरी पुनः मतदान हुने स्थिति नहुँदासम्म अन्य मतदान केन्द्रका मतपेटिकाका मतहरु समेत गणना नगर्न अनुरोध गर्दै मतगणनामा सहभागी नहुने विज्ञप्तीमा उल्लेख छ ।

विज्ञप्तीमा गाविस भवन फेदीमा भएको मतदान स्थल (क) र (ख) मा बिहानैदेखि प्रमुखका उम्मेदवार वैकुण्ठ न्यौपाने पक्षधर व्यक्तिहरुले मतदान केन्द्र नियन्त्रणमा लिई एकलौटी मतदान गरी मतदान केन्द्र कब्जा गरेको आरोप लगाइएको छ ।

शान्ति सुरक्षाको स्थिति बिगारेको, वडाध्यक्ष, सदस्यका उम्मेदवारहरु, दीपकराज जोशी र नेकपा एमालेका एजेन्टहरुलाई कुटपिट गर्दै मतदानस्थलमा बस्न नदिई लखेटिएको र शान्ति सुरक्षाको स्थिति सुधार गर्न दीपकराज जोशी र नेकपा एमालेका नेताले मुख्य निर्वाचन अधिकृत, प्रमुख जिल्ला अधिकारी र सुरक्षा प्रमुखलाई पटक पटक जानकारी गराउँदा समेत वेवास्ता गरी एकलौटी रुपमा भोट हाल्न मौन र्समर्थन दिँदा उक्त परिस्थिति उत्पन्न भएको जारी विज्ञप्तीमा उल्लेख छ ।

सेयर गर्नुहोस्

प्रतिक्रिया दिनुहोस्

सम्बन्धित खवर