बन्दिपुर र भानुका ४० घरपरिवारलाई राहत वितरण
भञ्ज्याङ न्यूज
तनहुँको बन्दिपुर गाउँपालिका र भानु नगरपालिकाका गरी ४० घरपरिवारलाई राहत एप प्रयोग गरी राहत वितरण गरिएको छ । कोरोना भाइरसका कारण समस्यामा परेका दैनिक ज्याला मजदुरी गरेर खाने, अपाङ्गता भएका कारण समस्यामा परेका, रोजगार गुमाएका र वृद्धवृद्धाहरुलाई सोमबार राहत वितरण गरिएको हो ।
बन्दिपुर गाउँपालिका वडा नं. १ र ४ का डुम्रे, विजयपथ, रिमाल्नी, भुडाटर, गुरुङ्गटार, आरूबोटे लगायतका ४० घर परिवारलाई प्रति व्यक्तिलाई १५ केजी चामल, दाल १ केजी, २ पोका तेल, १ पोका नुन, २ वटा हात धुने र २ नुहाउने साबुन, सोयाबिन १ पोका, मिक्स मसला १ पोका, चाउचाउ ५, बिस्कुट ६ र मञ्जन १ पिस उपलब्ध गराइएको छ ।
रुमसनको आर्थिक तथा राहत एपको प्राविधिक सहयोग तथा डुम्रे सांस्कृतिक युवा परिवारको समन्वयमा उक्त राहत वितरण गरिएको युवा परिवारका अध्यक्ष कैलाश श्रेष्ठले बताए । नयाँ प्रविधिको प्रयोग गरी राहत एप मार्फ विभिन्न समय र परिस्थिमा पारदर्शी ढंगबाट सम्बन्धित ब्यक्तिलाई नै राहत उपलव्ध गराउन ब्लकटेन प्रविधिको प्रयोग गरी बनाइएको एप निर्माता कम्पनीले जनाएको छ ।
यस एपको प्रयोग गरी काठमाडौंको दुइ स्थान र चितवनको चेपाङ्ग बस्तिमा यसअघि नै राहत वितरण गरिसकिएको छ । एपको प्रयोग गरेर सामाग्री प्रदान गर्दा निकै सहज र सजिलो भएको राहत सुचिकृत पसल स्वेता स्टोर्सका प्रोपाइटर गणेश श्रेष्ठले बताए । कहिल्यै नसुनेको नदेखेको भए पनि नयाँ प्रविधिको प्रयोग गरी राहत लिन पाउँदा सजिलो र भरपर्दो महसुस भएको भानु-१ का रामबहादुर परियारले बताए ।
हाल राहत एप परीक्षणको क्रमममा रहेको र निकै राम्रो प्रतिक्रिया आईरहेको संस्थापक अस्मिता मानन्धर श्रेष्ठले बताए । आवश्यकता अनुसार विभिन्न प्रकारका सेवाहरू थप गर्दै लैजाने अर्का संस्थापक रुमी सिंहले बताए । राहत कार्यक्रमको लागि बन्दिपुर-१ निवासी रुमसनका सदस्य सृष्टि पिया र डुम्रे अभिजेश पियाले सहजीकरण गरेका थिए ।
