तनहुँको व्यासलाई पूर्ण खोप सुनिश्चितता तथा दिगोपना घोषणा
तनहुँको व्यास नगरपालिकालाई पूर्ण खोप सुनिश्चितता तथा दिगोपना घोषणा गरिएको छ । ‘स्थानीय स्वामित्व र सहभागितामा-पूर्ण खोप सुनिश्चितता हाम्रो प्रतिवद्धता’ भन्ने नाराका साथ खोप समन्वय समिति व्यास नगरपालिकाले आइतबार एक कार्यक्रमका बिच पालिकालाई पूर्ण खोप सुनिश्चितता तथा दिगोपन घोषणा गरिएको हो ।
पालिकाभित्र खोप लगाउने उमेर समूहका सबै बालबालिकाले खोप लगाएको सुनिश्चित भएपछि पालिकालाई पूर्ण खोपयुक्त पालिका सुनिश्चितता घोषणा गरिएको स्वास्थ्य शाखा प्रमुख प्रमोद सोतीले जानकारी गराए । जन्मेदेखि ५९ महिनासम्मका बालबालिकालाई सबै प्रकारका खोप लगाएपछि वडालाई पूर्ण खोपयुक्त वडा बनाउँदै पालिकालाई पूर्ण खोप सुनिश्चितता घोषणा गरिएको उनले बताए ।
चैत महिनाभर सबै वडाको प्रत्येक घरधुरीमा स्वास्थ्यकर्मीको उपस्थितिमा बालबालिकाको र्सर्वेक्षण गरी अघिल्लो खोप कार्यक्रममा छुटेका बालबालिका पत्ता लगाइएको थियो । वैशाख महिनामा खोज र खोप अभियान संचालन गरी छुटेका बालबालिकालाई पुनः खोप दिएपछि पूर्ण खोप घोषणा गरेको जनस्वास्थ्य निरीक्षक लक्ष्मी गुरुङले जानकारी गराइन् ।
नगरपालिकाभर ०-५९ महिना उमेर समूहका ३ हजार ४१९ जना बालबालिका रहेकोमा ३८ जना खोप लगाउनबाट छुटेका थिए । जसमा एक जना बालकले कुनै पनि खोप नलागएको र ३७ जना आंशिक रुपमा बञ्चित रहेको निरीक्षक गुरुङले जानकारी गराइन्।
उनका अनुसार छुटेका मध्ये १ र २ का ५/५ जना, ३ र ४को एक/एक जना, ५ नं. वडाका १० जना, ७ को ३ जना, १० र ११ का ३/३ तथा १२ को ८ जना रहेका थिए । उनीहरुले पनि खोप पाएपछी पूर्ण खोप घोषणा गरिएको हो ।
कार्यक्रममा पालिका खोप समन्वय समितिका संयोजक एवं जिल्ला समन्वय समितिका प्रमुख शान्तिरमण वाग्लेले पूर्ण खोपले स्वस्थ्य नागरिक उत्पादनमा सहयोग पुग्ने बताए । स्वस्थ्य नागरिक समृद्धिको आधर भएकाले कुनै पनि नागरिक आधारभूत स्वास्थ्य सेवाबाट बञ्चित हुन नहुने बताए । उनले आधारभूत स्वास्थ्य सम्बन्धी जिम्मेवारी स्थानीय सरकारको भएकाले नागरिक सचेतना मार्फ र्सर्नेसँगै नर्सर्ने रोगबारे पनि ध्यान दिन उनले आग्रह गरे ।
यस्तै, कार्यक्रममा व्यास नगरपालिकाका प्रमुख वैकुण्ठ न्यौपानेले पूर्ण खोप घोषणाको कार्यान्वयनमा प्रतिवद्ध रहेको बताए। उनले भने, ‘पालिका नागरिकको स्वास्थ्यका सवालमा गम्भिर रहेकाले सहज र सुलभ सेवा दिन पालिका प्रतिवद्ध छ ।’
कार्यक्रममा पालिकालाई पूर्ण खोप सुनिश्चितता प्रमाणपत्र पालिका खोप समन्वय समितिका संयोजक शान्तिरमण वाग्लेले पालिका प्रमुख न्यौपानेलाई हस्तान्तरण गरेका थिए भने वडा कार्यालयलाई नगरप्रमुख न्यौपानेले प्रमाणपत्र प्रदान गरेका थिए ।
नेपालको संविधानको धारा ३५ मा प्रत्येक नागरिकलाई राज्यबाट आधारभुत स्वास्थ्य सेवा निःशुल्क प्राप्त गर्ने हक हुने र कसैलाई पनि आकस्मिक स्वास्थ्य सेवाबाट बञ्चित गरिने छैन भनि स्वास्थ्य सेवालाई नागरिकको मौलिक हकको रुपमा स्थापित गरेको छ ।
यसैगरी नेपालको संविधान २०७२ अनुसार आधारभूत स्वास्थ्य सेवाहरुको संचालन तथा ब्यवस्थापन स्थानीय सरकारको अधिकारक्षेत्र भित्र ब्यवस्था भएको सो अनुसार स्थानीय सरकार संचालन ऐन, २०७४ को परिच्छेद ३ मा गाउँपालिका तथा नगरपालिकाको काम, कर्तव्य र अधिकार र वडा समितिको काम कर्तव्य र अधिकार भित्र आधारभूत स्वास्थ्य सेवा अर्न्तर्गतको खोप सेवा संचालनको ब्यवस्था गरेको छ ।
