व्यासका मेयर ज्यूलाई खुल्लापत्र : कहिलेसम्म रिस्तीबासी बत्तिमुनिको अध्यारोमा बस्ने ?

आदरणीय ब्यास नगरपालिका दमौलीका मेयर बैकुण्ठ न्यौपाने ज्यू ! जय नेपाल ।

भेटेरै कुरा गर्ने तीब्र चाहाना थियो तर मनको हुटहुटीले खुल्लापत्र लेख्न बाध्य पार्‍यो, मन दुखे माफ गर्नुहोला ।

तपाईको जितसंगै विजय जुलुस मनाउदा अत्यन्तै खुसी थिए र छु पनि । दोश्रो कार्यकालको लागि कडा प्रतिश्प्रधामा चुनाब जितेको दिनबाटै तपाई जनताको घर दैलोमा समस्या समाधान गर्दै हिडेको देख्दा ब्यास नगरपालिकाले सच्चा, परिश्रमी र कर्मनिष्ठ उम्मेदवार पाएको महशुस गरेको थिए ।

मेयर ज्यू ! जनता जनार्दन हुन । अघिलो योजना पूरा हुनुपर्छ भन्दै जनताले यसपालि अरू दललाई पर्छार्दै कुशल व्यक्तिको छनौट गरेका हन । एमाले सहितको बलियो स्वतन्त्र गठबन्धनलाई पराजित गर्दै यसपालि कांग्रेसको तर्फाट तपाईंले कडा टक्करमा विजय हुने चानचुने कुरा थिएन । अवसरवादी, आत्मघाती र कांग्रेस भित्रका भाईरसहरूलाई गतिलो थप्पड पनि थियो त्यो जित ।

पार्टीको हैसियतसंगै तपाईंको व्याक्तिगत पहिचान, लगनशीलता र कर्तव्यनिष्ठताले जनताले हजुरलाई चुनेका हुन भन्ने बुजेको छु मैले । तपाईं प्रति जनताको धेरै आशा अनि भरोसा छ । मलाई पुरा विश्वास छ तपाईं त्यो अग्नि परिक्षामा खरो उत्रनु हुनेछ । हिजोको ५ वर्षमा पुरा नभएका कार्ययोजनाले अबको ५ वर्षमा पूर्णता पाउनेछ ।

याद रहोस् मेयर ज्यू ! हजुरले बोलेका र गरेका बाचा हामीसँग सामाजिक संजालमा सुरक्षित छन । तपाईं पेशाले वकिल र प्राध्यापक हुनुहुन्छ । एउटा मध्यम परिवारबाट तनहुँको राजनीतिमा आउनु भएको हो भन्ने बुझेको छु । गरिबी, भोक, प्यास र बिपन्नतालाई नजिकैबाट नियाल्नु भएको छ ।

भोकानाङ्गा र दिनदुःखीको पीडालाई नजिकबाट बुझ्नु भएको छ । सबैलाई एक साथ समेटेर लैजान सक्ने हजुरमा क्षमता छ । जुन चाहना जनताले राखेका छन् । हाम्रो चाहना नेताले हामीलाई पैसाको मुठो बाडुन भन्ने कदापी होईन । हाम्रो शहर विकास र समृद्धिसँग जोडिएको, बाटो, शिक्षा स्वास्थ्य, बिजुली पानी हरेक घरले भोकचलन गर्न पाओस् । शान्ति सुरक्षाको महशुस गर्न पाईयोस । जातीय, धर्मिक, लैङ्गकि, सामाजिक मतभेद्को अन्त्य होस । हरेक धर्मको सम्मान होस सब मिलिजुली बस्न पाइयोस । हाम्रो नगरले विकासका पूर्वाधार चुम्न सकोस । जनताको चाहना यति हो भन्ने मैले राम्रोसंग बुझेको छु ।

केही महिनादेखि म मेरो पुख्र्यौली जन्मथलो स्याहार सुसार गर्दैछु त्यो हजुरले विकास गर्न बाचा गरेको र तपाईलाई रिपोलिङ हुँदा उत्साहजनक मतान्तर सहित जित निकाल्न सघाएको वडा हो ब्यास-८ रिस्ती, जुन बहालवाला राष्ट्रपति रामचन्द्र पौडेलज्युको समेत जन्मथलो हो ।

विकासको दृष्टीले अत्यन्तै नाजुक र पछि परेको सर्बबिदितै छ । नेपाली राजनीतिमा सधै शीर्ष भुमिकामा रहदा रामचन्द्र पौडेलले जिल्लाको सुदुर उत्तरमा पर्ने यो वडाको बृहत्तर हितमा काम नगर्नु भएको होईन । ठुला काम थालनी भए तर अधुरा रहे । देशमा बर्बर द्वन्द्व हुँदा हुनेखाने धेरै बर्साई सरे । कम जनसंख्या र भौगोलिक कठनाई विकास बाधक बन्यो । त्यै पनि उहाँको जोड बिशेष र स्मरणीय नै छ र थियो पनी । अब सकृय राजनीति त्यागेर सम्माननीय पदमा बसेपछि उहाँको दायित्व समेत बहन गर्ने अभिभारा तपाईमा आएको छ । तर तपाईले चुनाबमा घोषणा गरेका साना मसिना काम समेत नगर्दा र बेवास्ता गरिदा बत्ति मुनिको अध्यारो भएको छ रिस्ती ।

मेयरज्यु तनहुँ हुँदै जाने कालिका मार्गको काम थालनि भएको छ कालान्तरमा बन्दै जाला तर वडासम्म लमजुङबाट छोएको पहुचमार्ग पिच गर्न कस्ले रोक्यो ? जवाफ खोजेका छन जनताले । आजसम्म रिस्ती उपत्यकामा डक्टर वा एच ए सहितको स्वास्थ्य चौकि छैन सामान्य उपचार समेत गर्ने ठाउँ छैन के यो वडाका बासिन्दा नगरपालीका होईनन कि यिनीहरू अर्कै दर्जाका हुन ।

केहीदिन अघि वडा भवनमा सामान्य काम परेर छिरेको थिए वडामा बसेकै समय बेजोडको पानी पर्‍यो । वडा कार्यालयमा पानी चुहेको दृश्य देखेर म त मुकदर्शक थिए । वडाध्यक्ष स्वयं फेसबुक लाईभ गर्दै हुनुहुन्थ्यो । उहाँलाई बिचरा भन्ने बाहेक मसंग अरू कुनै शब्द थिएन । वडा भवन आजसम्म किन बनेन भनेर प्रश्न गर्ने त आटै आएन । यो सायद मेरो जीवनकै अबिस्मरणीय घटना होला । मेयर ज्यु ! तपाईको मेनफेस्टोमा यो बन्ने कुरा लेखिएको थिएन र ?

तपाईले विकास उन्मुख देश र भू-भागको सफल भ्रमण गरिसक्नु भएको छ । देश विकास र राष्ट्र राष्ट्रियतालाई कसरी अगाडि बढाउन सकिन्छ भन्ने कार्ययोजनाको स्पष्ट खाका कोर्न सक्नु हुन्छ । कसरी विकासको चरमचुलीमा पुग्न सकिन्छ भन्ने राम्रो ज्ञान हजुरमा छ । हजुर कुशल अनि सक्षम हुनुहुन्छ भन्ने विश्वासका साथ जनताले हजुरलाई निर्वाचनमा विजयी गराएका छन् ।

हाम्रो वडाको नमुना र ऐतिहासीक बस्ती हो सहिद बस्ती पुलिमराङ । जुन ठाउँ धेरै भुपु सैनिक र अब्बल दर्जा र बिशिष्ट ब्यक्तित्वहरूलाई जन्माएको थलो हो । नेपाली लोकतान्त्रीक आन्दोलनको झिल्को कोरिएको सहिदको रगत सिन्चित भुगोल हो । यो गाउँ र ठाउँमा नपुग्ने सायदै होलान, पुगेपछि अत्यन्तै रमणीय छ ठाउँ तर के यो ठाउँका मानिस बर्खामा बिरामी हुदैनन हो ? कि हिउँदमा मात्र आवतजावत गर्छन ? मैले बुझिन उनिहरुले खोजेका केही छैनन । पिच बाटो पनि होईन उच्च स्तरीय ग्राभेल बाटो जहाँ हिउँद बर्खा सधै यातायातका साधन चलोस् । बिडम्बना पानी परे तलै बास बस्नुपर्ने तर बस्ने ठाउँ छैन अनि हिडेरै घर पुग्नुको बिकल्प छैन उनिहरूसंग । अब भन्नुस यो सामान्य समस्या हल कसले गर्ने ? कि स्थानीय सरकार हेरिरहने अरूले स्वाद फेरिरहने हो ? मेयर ज्यु प्रदेश र संघीय सरकारमा जान पनि त तपाईको पहल र दायित्व बढि हुन्छ होईन र ? संगै प्रदेश र संघका प्रतिनिधिलाई पनि यो प्रश्न सोधौला ।

मुटुभरी घरपरिवारको सम्झना, मन भरी देशको माया बोकेर आँसुको धारले मुख पुछ्दै दिनहुँ हजारौंको संख्यामा विदेशीने युवाको आशाको दियो बन्नपर्छ तपाईं । आफ्नै सन्तानबाट अपहेलित भएर घरबाट निकालिएका वृद्ध बावुआमाको भरोसाको खम्बा हुनुपर्दछ तपाई । अन्यायमा परेका चेलिबेटीको माइती बन्नपर्छ तपाईं । बेरोजगारीको पीडामा छटपटाइ रहेका युवाको बलियो आधारशिला हो तपाई । बर्सौदेखि पिछडिएका रोग, भोकसंग पैठ्यजोरी खेलिरहेका तनहुँका जनताका मेयर हुनुहुन्छ तपाई ।

त्यसैले आफ्नो प्रतिवद्धतामा कत्ति पनि बिचलित नभएर काम र कर्तव्य पुरा गर्दै जानु । हरेक समयमा जनतासंग हातमा-हात मिलाएर अगाडि बढनु । अबको ४ बर्षमा नेपालकै नमुना शहर भनि ब्यास नगरपालिकालाई चिनाउने काम गर्नु । विकसीत शहरको रुपमा देश विदेशमा चिनियोस् हाम्रो तनहुँ । राजनीतिलाई फोहोरी खेल भन्दै देश विकासको हातेमालोबाट पन्छिन खोज्ने युवाहरुलाई मुलधारमा लिएर राजनीति भित्र सबै खराब र गलत र अबसरबादी आचरण भएको ब्याक्ति मात्रै होइनन्, लौ है बैकुन्ठ जस्ता होनहार र कर्तब्यनिष्ठ ब्यक्ति पनि छन भनेर अलग छवि कायम गर्न सक्नु । अब आउने चुनाबमा भोट माग्न घर-घर जान नपरोस ।

जनताको इच्छा कांग्रेसलाई नै भोट हाल्न आतुर हुन । ब्यास नेपालकै नमुना शहर बनोस । अहिले मात्र होइन तनहुँबासीले आगामी सयौ बर्षसम्म बैकुयठ बैकुण्ठ भनुन । हजुरहरुले भने जस्तै रोजगारीको शहर बनोस दमौली । युवा व्यावसायिकको गन्तव्य बनोस दमौली । सफा स्वच्छ र हराभराको पहिचान बनोस दमौली । फूलैफूलको बगैंचा भनेर नेपालमा मात्र होईन विश्वसामु अलग पहिचनसहित चिनियोस हाम्रो तनहुँ । समृद्ध र राम्रो तनहुँ भन्दै बाँकी कार्यकाल सफलताको हार्दिक शुभकामना ।

उही तपाईको शुभचिन्तक
नवीनराज पौडेल
अध्यक्ष : रिस्ती विकास समाज
ब्यास नगरपालिका-८, रिस्ती, तनहुँ ।

सेयर गर्नुहोस्

प्रतिक्रिया दिनुहोस्

सम्बन्धित खवर