क्षतिग्रस्त संरचना पुनःनिर्माणमा माओवादी केन्द्र तनहुँको जोड
दमौली : नेकपा माओवादी केन्द्र तनहुँको बुधबार सबेको बैठकले जेनजी आन्दोलनका सहिदप्रति श्रद्धाञ्जली अर्पण गर्दै भ्रष्टाचारमुक्त समृद्ध नेपाल निर्माणमा सबैलाई सक्रिय भूमिका निर्वाह गर्न आह्वान गरेको छ ।
बैठकले भानुका ईश्वत अधिकारीसहित आन्दोलनमा बलिदान दिएका सहिदहरूप्रति श्रद्धाञ्जली व्यक्त गर्दै आन्दोलनका लक्ष्यहरूलाई आत्मसात् गर्दै भ्रष्टाचार अन्त्य र समृद्ध नेपाल निर्माणमा हरेक तहबाट योगदान दिनुपर्नेमा जोड दिएको छ ।
बैठकले आन्दोलनका क्रममा तनहुँ जिल्लामा भएका तोडफोड र आगजनीका घटनाबाट विभिन्न राजनीतिक दलका कार्यालय, जिल्ला प्रशासन कार्यालय, अन्य सरकारी कार्यालय, व्यास र शुक्लागण्डकी नगरपालिका, एकदेव आले स्मृति तथा चिन्तन प्रतिष्ठान तथा निजी सम्पत्तिहरूमा पुगेको क्षतिप्रति दुःख प्रकट गरेको छ । साथै, ती संरचनाको चाँडो पुनःनिर्माणका लागि पहल गर्न आग्रह गरिएको छ।
जिल्ला पार्टी कार्यालय पनि तोडफोड र आगजनीबाट ध्वस्त भएकाले त्यसको पुनःनिर्माणका लागि पार्टी सदस्य तथा शुभेच्छुकसँग सहयोग जुटाउने निर्णय गरिएको छ ।
त्यसैगरी, असोज ३ गते बिहान ११ बजे जिल्ला कार्यालयमा “संविधान दिवस” विशेष कार्यक्रमका रूपमा “जेनजी आन्दोलनले उठाएका मुद्दा र नेपालको संविधान“ विषयक अन्तरक्रिया कार्यक्रम आयोजना गरिने भएको छ ।
बैठकले अभियानलाई निरन्तरता दिने निष्कर्ष समेत निकालेको माओवादी केन्द्र तनहुँले जनाएको छ ।
