जीवन्त सांस्कृतिक संग्रहालय निर्माणका लागि दमौलीमा सांस्कृतिक महोत्सव
दमौली : तनहुँको सदरमुकाम दमौलीमा आगामी पुस २४ गतेदेखि माघ ५ गतेसम्म छैटौं आदिवासी जनजाति सांस्कृतिक महोत्सव गरिने भएको छ । नेपाल आदिवासी जनजाति महासंघ जिल्ला समन्वय परिषद तनहुँले दमौलीस्थित खुला मैदानमा महोत्सव सञ्चालन गर्न लागेको हो ।
लोपोन्मुख आदिवासी जनजातिका भाषा, लिपि, संस्कार र मौलिक संस्कृतिको संरक्षण तथा प्रवर्द्धन गर्नु महोत्सवको मुख्य उद्देश्य रहेको आयोजकले जनाएको छ । महोत्सवबाट बचत हुने रकम व्यास नगरपालिका–१२, कमलबारीस्थित भानु–घाँसीग्राम क्षेत्रमा खुला जीवन्त सांस्कृतिक संग्रहालय निर्माणमा खर्च गरिने महासंघका जिल्ला अध्यक्ष सनम तामाङले जानकारी गराए ।
महोत्सवमा आदिवासी जनजातिका झाँकी, मौलिक सांस्कृतिक नृत्य–गीत, जातीय पहिचान झल्कने परिकार, हस्तकला, अर्गानिक कृषि उपज तथा स्थानीय उत्पादनलाई विशेष प्राथमिकता दिइनेछ । साथै, जिल्लाभित्रका होमस्टे प्रवद्र्धनलाई समेत महोत्सवसँग जोडिने जनाइएको छ ।
सोमबार दमौलीमा आयोजित पत्रकार सम्मेलनमा महासंघका जिल्ला अध्यक्ष तामाङले महोत्सव मनोरञ्जनमा मात्र सीमित नहुने बताउँदै यसले सांस्कृतिक जागरण, पहिचान स्थापना र पर्यटन विकासमा महत्वपूर्ण योगदान पु¥याउने विश्वास व्यक्त गरे ।
पत्रकार सम्मेलनमा महासंघका पूर्व अध्यक्ष हरिसिंह गुरुङलगायत पदाधिकारीहरूले महोत्सवको व्यवस्थापन र पारदर्शिताबारे जानकारी गराएका थिए । आयोजकले संस्कृति संरक्षण र पहिचान प्रवर्द्धनका लागि महोत्सवमा सक्रिय सहभागिता जनाउन सबैलाई आग्रह गरेको छ ।
