कपडा बैंकको सहयोगार्थ “लायन्स महाउत्सव”
भञ्ज्याङ समाचारदाता/दमौली
आर्थिक स्थिति कमजोर भई कपडाबाट बञ्चित भएकाहरुलाई लक्षित गरी सञ्चालन गरिएको कपडा बैंकको सहयोगार्थ अंग्रेजी नयाँ वर्षमा लायन्स महाउत्सव गरिने भएको छ । लायन्स क्लब अफ तनहुँ दमौलीले व्यास नगरपालिका-३ स्थित अन्सन चौतारी अगाडिको दमौली सेन्टर पार्कमा डिसेम्बर ३१ मा न्यु इयार इभ कन्सर्ट-२०२१ सञ्चालन गर्ने आइतबार दमौलीमा पत्रकार सम्मेलन गरी जानकारी गराएको छ। व्यास-३ तरकारी लाईनमा रहेको लायन्स कपडा बैंकको सहयोगार्थ महाउत्साव गर्न लागिएको क्लवका अध्यक्ष राजु रानाले बताए । ‘सामाजिक कार्य संगसंगै जिल्लालाई नै पर्यटकीय केन्द्रविन्दुको रुपमा स्थापित गर्ने हाम्रो लक्ष्य छ’, उनले भने, ‘यसका लागि हामीले राष्ट्रिय स्तरका कलाकार र व्याण्ड पनि ल्याउने भएका छौं । स्थानीय कला, संस्कृतिको सम्मान गर्दै स्थानीय कलाकारको पनि प्रस्तुति रहनेछ ।’
‘दमौली सानो ठाउँ रहेको र नयाँ वर्ष लक्षित त्यति कार्यक्रम नहुँदा पोखरा, चितवन लगायत स्थानमा तनहुँबासी मनोरञ्जन खोज्न जान्छन्’, उनले भने, ‘उनीहरुलाई यही टिकाइराख्न र नयाँ वर्षा साथीभाई र परिवारसंग आफ्नै ठाउँमा रमाउनका लागि पनि यो कार्यक्रमले मद्दत गर्नेछ ।’
उक्त महाउत्सवमा कलाकार सोनम तोपडेन, रचना रिमाल, सोभा त्रिपाठी, दि फ्रिक स्टि्रट व्यान्ड, राइभ डिजे र स्थानीय व्यान्ड र कलाकारको प्रस्तुति रहेको क्लवका सचिव विसाल पण्डितलले बताए । महाउत्सवको लागत करिव १५ लाख रुपैयाँको लागत अनुमान गरिएको र २ हजार बढि दर्शकको उपस्थिति रहने आयोजकले जनाएको छ । प्रवेश शुल्क ५ सय रुपैयाँ प्रति टिकट हुनेछ भने करिव ३ लाख रुपैयाँको बचत गर्ने क्लवले लक्ष्य लिएको छ ।
