एमसीसीको विरुद्धमा सत्तारुढ घटक जनमोर्चा सहितका दलद्वारा दमौलीमा प्रदर्शन
भञ्ज्याङ न्यूज
एमसीसी कार्यान्वयनमा नल्याउन दबाब दिंदै तनहुँको दमौलीमा बुधबार विरोध प्रदर्शन गरिएको छ । सत्तारुढ गठबन्धनमा रहेका जनमोर्चासहित ५ कम्युनिस्ट पार्टी र दुइ मोर्चाले एमसीसी विरुद्ध दमौलीमा प्रदर्शन गरेको हुन् ।
एमसीसीका विरुद्धमा नारावाजी र जुलुसहित दमौली बजार परिक्रमा गरी अनसन चौतरीमा आई कोणसभामा परिणत भएको थियो ।
कोणसभमा बोल्दै नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका केन्द्रीय सदस्य पूर्णजित पुनले देशका शासक विदेशीको दलाल भएको आरोप लगाए । उनले ‘दलाल शासकले नेपाली जनतालाई भोट बैंकको रुपमा प्रयोग गरेका र एमसीसी मार्फ अमेरिका र भारतले जलस्रोतमा आँखा लगाइरहेको छ ।’
विरोध प्रदर्शनमा राष्ट्रिय जनमोर्चा जिल्ला समन्वय समिति तनहुँ, नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी, नेपाल कम्युनिष्ट पार्टी (मसाल), नेकपा (क्रान्तिकारी माओवादी), वैज्ञानिक समाजवादी कम्युनिष्ट पार्टी, देशभक्त जनगणतान्त्रिक मोर्चा नेपाल र हाम्रो नेपाल, हाम्रो नेपाली लगायतका पार्टीका नेता तथा कार्यकर्ताहरु सहभागि भएका थिए ।
कोणसभाका वक्ताहरुले प्रधानमन्त्री शेरबहादुर देउवा नेतृत्वको गठबन्धन सरकारले राष्ट्रघाती एमसीसी सम्झौता संसदबाट अनुमोदन गर्न गरेको प्रयत्न नेपालको राष्ट्रिय स्वाधीनता माथिको निर्मम प्रहार र दुस्साहस भएको ठहर गर्दै यसका विरुद्ध सशक्त आन्दोलन सिर्जना गर्न उनीहरुले आग्रह गरेका छन् ।
उनिहरुले एमसीसी परियोजना कार्यान्वयनमा आए देशको राष्ट्रियता तथा स्वाधीनतामा ठूलो असर पर्ने भन्दै एमसीसी परियोजना खारेज नभएसम्म आन्दोलनका कार्यक्रम जारी राख्ने चेतवानी दिएका छन् ।
एमसीसी परियोजना कार्वान्वयनमा आउन नदिनको लागी आफुहरुले सधैँ खबरदारी गरिरहने विरोधमा उत्रिएका दलहरुले बताएका छन् । विरोधमा सहभागिहरुले राष्ट्रघाती एमसीसी सम्झौता खारेज गरौ, राष्ट्रिय स्वाधिनताको रक्षा गरौ, नो एमसिसि लगायतका नारा लगाएका थिए ।
