बन्दिपुरको २ वटा वडामा सोह्रसय रोपनी क्षेत्रफलमा चक्लाबन्दी

कृषि क्षेत्रलाई आधुनिकिकरण गर्ने अभियान अन्तरगत तनहुँको बन्दिपुर गाउँपालिकाले चक्लाबन्दी कार्यक्रमलाई प्राथमिकतामा राखेको छ । गाउँपालिकाले दुइ वडामा गरी करिब १ हजार ६०० रोपनी जग्गा चक्लाबन्दी गरेको छ ।

वडा नं. ३ मा एक हजार रोपनी र वडा नं. १ मा ६ सय रोपनीमा चक्लाबन्दी गरेको गाउँपालिकाले जनाएको छ । कृषि क्षेत्रलाई आधुनिकिकरण, व्यवसायीक तथा सामुहिक खेती तर्फ आकर्षित गर्न गाउँपालिकाले जग्गा चक्लाबन्दी कार्यलाई तीब्रता दिदै आएको गाउँपालिकाका अध्यक्ष पुर्णसिं थापाले बताए ।

‘कृषि क्षेत्रमा आधुनिकिकरण गरी उत्पादनमा बृद्धि गर्ने लक्ष्य राखिएको छ’, उनले भने, ‘यही अभियान अन्तरगत अहिले वडामा रहेका स-साना गह्रा र बारीमा गोरुले जोत्न पनि गाह्रो हुने र गोरु पाल्ने चलन पनि बिस्तारै हराउँदै जान थालेपछि जग्गा चक्लाबन्दी कार्यलाई प्राथामिकतामा राखिएको हो ।’ जग्गा चक्लाबन्दी गरिएको क्षेत्रमा जोत्न र खेती लगाउन सजिलो होस भन्ने उद्देश्यले ५० प्रतिशत अनुदानमा हाते टयाक्टर उपलव्ध गराइएको अध्यक्ष थापाले बताए ।

किसानको माग बमोजिम कुनै पनि किसानलाई नछुटाइकन केही समय अघि ट्याक्टर, कुटानी पिसानी मिल लगायतका ५२ थान कृषि औजर प्रदान गरिएको छ । गाउँपालिकाले १४ लाख मूल्य बराबरको आधुनिक कृषि औजारहरु किसानलाई अनुदानमा वितरण गरेको छ ।

जमिन चक्लाबन्दी गरेपछि त्यसक्षेत्रका किसानहरु उत्साहित भएर खेती गर्ने कार्यमा लागेका छन् । साना खेतबारीलाई डोजर लगाएर ठुला गह्रा बनाएपछि खेती लगाउन सजिलो हुनुका साथै आधुनिक कृषि औजर प्रयोग गरिदाँ थोरै जनशक्तिले राम्रो प्रतिफल लिन सहज हुने कृषकहरु बताउँछन् ।

चक्लाबन्दी मार्फत कृषि उत्पादनमा बृद्धि गराइ खाद्यन्न बालीमा गाउँपालिकालाई आत्मनिर्भर बनाउने लक्ष्य गाउँपालिकाले लिएको छ । गाउँपालिकाले जमिन चक्लाबन्दी गर्न थालेपछि अन्य पालिकालहरुले पनि यस कार्यलाई अवलम्बन गर्न थालेका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर