भानुमा खुल्ला तीज गीत प्रतियोगिता
भानु । तनहुँको भानु नगरपालिका–१ भन्सारमा खुल्ला तीज गीत प्रतियोगिता गरिने भएको छ । भानु नगर उद्योग वाणिज्य संघ, महिला उद्यमी विकास समितिले नेपाली नारीहरुको महान पर्व हरितालिका तीजको अवसरमा आगामी भाद्र १५ गते भन्सारको ग्रीनपार्कमा संयुक्त रुपमा प्रतियोगिता गर्न लागेको हो ।
भानु महिला उद्यमी विकास समितिकी सभापति पुनम श्रेष्ठका अनुसार तीज गीत प्रतियोगितामा प्रथम हुने समूहले ३५ हजार र प्रमाण–पत्र, द्धितीय हुने समूहले २५ हजार र प्रमाण–पत्र, तृतीय हुने समूहले १५ हजार र प्रमाण–पत्र, सान्त्वना हुने दुई समूहले ५/५ हजार रुपैयाँ र प्रमाण–पत्र, उत्कृष्ट नृत्यलाई ५ हजार प्रमाण–पत्र र प्रतियोगितामा सहभागी प्रत्येक समूहलाई १/१ हजार रुपैयाँ प्रदान गरिने भएको छ ।
गाउँघरमा भएका प्रतिभाहरुलाई प्रस्फुटन गराउँदै मौलिक कला संस्कृतिको संरक्षण गर्ने उद्देश्यले कार्यक्रम आयोजना गरिएको संरक्षक भानु नगर उद्योग वाणिज्य संघका अध्यक्ष कृष्णकुमार श्रेष्ठले बताए ।
निःशुल्क रुपमा टिम दर्ता गरी प्रतियोगितामा सहभागिता जनाउन पाइने बताइएको छ । भानु नगरपालिकाका प्रमुख आनन्दराज त्रिपाठीले महिलाहरुले नेतृत्व विकास, मौलिक कला, संस्कार, सँस्कृतिको संरक्षण र आय–आर्जनमा समेत जोडिन आग्रह गर्दै उनले यस्ता कार्यक्रमलाई नगरपालिकाले हातेमालो गरेर अगाडि बढ्न तयार रहेको बताए ।
भानु नगरपालिका वडा नं १ की वडा अध्यक्ष कान्छीमाया तामाङले नारीहरुको महान चाड तीजको पूर्वसन्ध्यामा कार्यक्रम हुने भएकाले आफू पनि महिलाको प्रतिनिधित्व गरिरहेकाले यस्ता कार्यक्रमलाई प्रभावकारी बनाउने सहयोग गर्ने प्रतिवद्धता जनाइन । समितिले प्रतियोगितामा विभिन्न संघसंस्था नगरपालिकाका १३ वटै वडासंग समन्वय र सहकार्य गरिने भएको छ ।
