तनहुँमा डेंगी संक्रमितको संख्या बढ्दो, ९१४ जनामा संक्रमण पुष्टि
दमौली । तनहुँमा पछिल्लो केहीदिन यता डेंगी संक्रमितको संख्या दैनिक बढ्दै गएको छ । गत वर्ष व्यास नगरपालिकामा महामारिकै रुपमा फैलिएको डेंगी संक्रमण यस वर्ष आँवुखैरेनीमा डेंगी संक्रमितको संख्या धेरै देखिएको छ ।
स्वास्थ्य कार्यालय तनहुँका अनुसार जिल्लामा सोमबारसम्म ९१४ जनामा डेंगी संक्रमण पुष्टि भएको छ । कार्यालयका अनुसार सबै भन्दा बढी संक्रमित आँवुखैरेनी गाउँपालिकामा ६८८ जना रहेका छन् ।
स्वास्थ्य कार्यालयका अनुसार शुक्लागण्डकी नगरपालिकामा ११७ जना, व्यास नगरपालिकामा ५८ जना, बन्दीपुर गाउँपालिकामा ४१ जना, म्याग्दे गाउँपालिकामा ७ जना र भिमाद नगरपालिकाका ३ जनामा डेंगी संक्रमण पुष्टि भएको छ ।
गत वर्ष तनहुँमा ८ हजार बढी जनामा डेंगी संक्रमण पुष्टि भएको थियो भने ५ जनाको मृत्यु भएको थियो । यस वर्ष व्यास नगरपालिका–७ का एक पुरुषको डेंगी संक्रमणका कारण मृत्यु भइसकेको छ ।
यस्तै, पालिकामा डेंगी संक्रमितको संख्या बढ्दै गएपछि आँवुखैरेनी अस्पतालमा डेंगीको परीक्षण र संक्रमितको उपचार निःशुल्क गरिएको छ । आबुँखैरेनी अस्पतालले सोमबार सुचना जारी गर्दै डेंगी संक्रमणका कारण उत्पन्न भएको संकटको समयमा आवश्यक स्वास्थ्य सेवाको पहुँच सबै नागरिकमा पु¥याउने उद्देश्यका साथ प्रराम्भिक लक्षण देखिएका सम्पूर्ण व्यक्तिलाई चिकित्सकको सल्लाह बमोजिम आबुँखैरेनी अस्पतालमा निःशुल्क परीक्षण र लक्षित वर्गलाई निःशुल्क उपचार सेवा उपलब्ध गराईने जनाएको छ ।
आबुँखैरेनी अस्पतालका अध्यक्ष एवं आबुँखैरेनी गाउँपालिकाका अध्यक्ष शुक्र चुमानले गरिव तथा विपन्न, नवजात शिशु, गर्भवती, सुत्केरी, वेवारिसे, असाहय, साहारा विहन अशक्त, अपाङ्गता तथा ज्येष्ठ नागरिकलाई निःशुल्क उपचार सेवा दिइने बताए ।
यस्तै बन्दीपुर गाउँपालिकामा पनि डेंगी संक्रमितको संख्या बढ्दै गएपछि डेंगी रोगको संक्रमण रोकथाम तथा नियन्त्रणका लागि पुर्व तयारी सम्बन्धी अन्तरक्रिया कार्यक्रम गरिएको छ ।
गाउँपालिकामाले सोमबार आयोजना गरेको अन्तरक्रिया कार्यक्रममा गाउँपालिका अध्यक्ष सुरेन्द्र बहादुर थापाले डेंगी संक्रमण फैलन नदिनका लागि सबै सचेत हुनुपर्ने बताएका छन् । उनले डेंगी संक्रमण फैलन नदिनका लागि डेंगी संक्रमण फैलाउने लामखुट्टे बस्ने सम्भावित ठाउँको पहिचान गरी ‘खोजौ र नष्ट गरौं’ अभियानलाई प्रभावकारी रुपमा सञ्चालन गर्नुपर्ने बताएका छन् ।
