बालविवाह मुद्दामा तनहुँ अदालतद्वारा पाँच जनालाई कैद फैसला
भञ्ज्याङ न्यूज
तनहुँ जिल्ला अदालतले बालविवाह मुद्दामा पाँच जना अभियुक्तलाई कैद फैसला सुनाएको छ । जिल्ला न्यायाधीश हरिशचन्द्र ढुङ्गानाको इजलासले कैद फैसला सुनाएको हो ।
तनहुँ जिल्ला अदालतका स्रेस्तेदार मीनबहादुर कुँवरका अनुसार पाँचै जना अभियुक्तलाई जनही १८ दिनको कैद फैसला र उनीहरूविरुद्ध जनही दुइ हजार रुपैयाँका दरले जरिवाना भएको छ ।
व्यास नगरपालिका-५ का प्रकाश श्रेष्ठ, तुलसीकुमार श्रेष्ठ, व्यास- ६ का महादेवबहादुर गिरी, भद्रबहादुर श्रेष्ठ र एक महिलालाई कैद र जरिवानाको फैसला भएको स्रेस्तेदार कुँवरले बताए ।
जबर्जस्ती करणीसमेत रहेको उक्त मुद्दामा बेहुलाले सफाइ पाएका छन् । प्रहरीले निजविरुद्ध वि.सं. २०७८ पुस १९ गते बालविवाह गरे गराएको भन्दै अदालतमा मुद्दा दर्ता गरेको थियो । उक्त मुद्दामा नौ पटक पेसी तोकिएको थियो ।
