व्यास नगरपालिकाद्वारा कृषकलाई आलुको बीउ वितरण
व्यास नगरपालिकालाई आलुको बीउमा आत्मनिर्भर बनाउन कृषक समूहलाई आलुको बीउ वितरण गरिएको छ । बीउ आलुमा आत्मनिर्भर बनाउने उद्देश्यसहित नगरपालिकाले साढे नौ टन आलुको बीउ वितरण गरेको बताएको छ।
काभ्रेपलाञ्चोकबाट जनकदेव र डिजिरे आलुको बीउ ल्याएर कृषक समूह मार्फ वितरण गरिएको नगरपालिकाका कृषि शाखा प्रमुख विश्वराज वाग्लेले बताए । निर्वाहमुखी खेती प्रणालीको अन्त्य गरी सामूहिक खेतीमा किसानलाई प्रोत्साहन गर्न आलुको बीउ वितरण गरिएको वाग्लेले बताए ।
हरेक वर्षबाहिरी जिल्लाबाट बीउ ल्याएर वितरण गर्नुभन्दा पनि नगरपालिकाभित्रै आलुको बीउ उत्पादनका लागि ११ समूहलाई बीउ वितरण गरिएको छ । “सधैँ बाहिरी जिल्लाबाट ल्याएर वितरण गर्दा आत्मनिर्भर बनाउन सकिएन, अब नगरपालिकाभित्रै आलुको बीउ उत्पादन गर्ने र यही उत्पादन भएको बीउ कृषकलाई वितरण गर्ने लक्ष्य छ”, उनले बताए ।
बीउ उत्पादनका लागि व्यास-५ स्थित सिन्धु सहकारी र हरियाली कृषक समूहलाई ३०/३० क्विन्टल आलु वितरण गरिएको छ । हरियाली कृषक समूहका अध्यक्ष रविचन्द्र आचार्यले समूहमार्फ दश रोपनी क्षेत्रफलमा आलुको बीउ लगाउने तयारी गरिएको जानकारी दिए ।
नगरपालिकाले खाने आलु वितरणका लागि भने वडा कार्यालयलाई जिम्मा दिएको छ । कृषकलाई वितरणका लागि दुइ पटकसम्म बोलपत्र आहृवान गरे पनि कसैले नभरेका कारण वडा कार्यालयमार्फ नै आलुको बीउ वितरणको जिम्मा दिइएको कृषि शाखाले जनाएको छ। नगरपालिकामा करीब ६ सय रोपनी क्षेत्रफलमा आलुखेती हुने गरेको छ। आलुमा अनुदान दिन थालिएपछि यहाँका कृषक यसतर्फआकषिर्त हुँदै गइरहेका छन् ।
