दमौली बजारमा मोवाइल चोरी गर्ने तीन पक्राउ

जिल्ला प्रहरी कार्यालय तनहुँले विभिन्न ठाउँमा मोवाइल चोरी गर्ने तीन जनालाई पक्राउ गरेको छ । व्यास नगरपालिका-४, व्यास नगरपालिका-२ बाट मोवाइल चोरी गरेर फरार तीन जनालाई प्रहरीले पक्राउ गरेको हो ।

व्यास नगरपालिका-४ स्थित सैलेन्द्र पण्डितको डेराकोठाबाट गत वैशाख ५ गते मोवाइल तथा नगद चोरी गरी फरार भएका व्यास-५ साँगेका २२ वर्षीय सुनिल थापा पक्राउ परेका छन् । उनलाई बिहीबार भोर्लेटारचोकबाट पक्राउ गरिएको प्रहरी नायब उपरिक्षका मोहनबहादुर खाँणले जानकारी दिए ।

यस्तै व्यास-२ जनजागृतीमार्ग स्थित लक्ष्मी श्रेष्ठको घरकोठाबाट दुइ थान मोवाइल चोरी गरी फरार रहेका व्यास-४ बागबजार बस्ने २२ वर्षीय ताइरे भन्ने सौरव दरै र म्याग्दे गाउँपालिका-१ गुणादी बस्ने १९ वर्षीय शैलेस परियार पक्राउ परेका छन् । उनीहरुलाई पनि विहीबारै दमौलीबाट पक्राउ गरिएको प्रहीले जनाएको छ । पक्राउ परेकाहरुलाई अदालतबाट एक साताको म्याद थप गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर