कृषकलाई अनुदानमा कृषि सामाग्रि वितरण
तनहुँको शुक्लागण्डकी नगरपालिकाले कृषि उत्पादन वृद्धि, यान्त्रीकरण र कृषकको उत्पादन लागत घटाउने उद्देश्यले ५० प्रतिशत अनुदान कार्यक्रमअन्तर्गत कृषकलाई कृषि सामग्री वितरण सुरु गरेको छ । कार्यक्रमअन्तर्गत वडा नं. ६ स्थित जाम्दीबेसी कृषक समूहका कृषकहरूलाई नगरप्रमुख कृष्णराज पण्डित, वडा अध्यक्ष बुद्धी थापाले मिनी टिलर, कम्बाइन मिल तथा त्रिपाल वितरण गरेका छन् । उक्त समूह चैते धान प्रवर्द्धन कार्यक्रमअन्तर्गत छनोटमा परेको छ ।
नगरपालिकाले वडा नं. ६ का जाम्दी कृषक समूह (चैते धान प्रवर्द्धन कार्यक्रम), राईपुर साना किसान कृषि सहकारी संस्था (आलु पकेट कार्यक्रम) तथा गोल्मे–साखे क्षेत्र -चैते धान कार्यक्रम) का लाभग्राही कृषकलाई सम्बन्धित स्थानमै हाते ट्र्याक्टर वितरण गर्ने भएको छ ।
नगरपालिकाले कृषिमा आधुनिक प्रविधिको प्रयोग बढाई उत्पादन तथा उत्पादकत्व वृद्धि गर्ने, श्रम अभावको समस्या समाधान गर्ने र कृषकलाई व्यावसायिक खेतीतर्फ आकर्षित गर्ने उद्देश्यले ५० प्रतिशत अनुदानमा कृषि उपकरण वितरण कार्यक्रम सञ्चालन गर्दै आएको नगरप्रमुख पण्डितले बताए । तस्विर : भञ्ज्याङ
