सयपत्री फूल व्यवसायको नयाँ गन्तव्य : आँवुखैरेनीमा उत्पादित सयपत्री फूल कतार पुग्यो
भञ्ज्याङन्यूज
नयाँ व्यवसायको सम्भावना देखिएकाले फूलखेती विस्तार गरी उद्यम तर्फउन्मुख गराउँछौं : अध्यक्ष चुमान
तनहुँको आँवुखैरेनी गाउँपालिकामा उत्पादित सयपत्री फूल कतार पठाइएको छ । कतारमा पहिलोपटक नेपाली फूल भित्रिएको हो । नेपालीहरुको दोश्रो ठूला पर्व तिहारमा अत्याधिक प्रयोग हुने सयपत्री फूल गाउँपालिकाको समन्वयमा कतार पठाइएको हो ।
नेपालीहरूको महान दोस्रो ठूलो रंगिन पर्व तिहारले गाउँ, शहर र विदेशमा बस्ने नेपालीहरूलाई छोपिसकेको छ । तिहार उज्यालो र फूलै-फूलको पर्व पनि हो । व्यावसायिक फूलखेती गर्दै आएका फूल किसानलाई अहिले फूल टिप्न भ्याइ नभ्याइ छ ।
आँबुखैरेनी गाउपालिकाको सहयोगमा वाड नं. १ स्थित आधिमुल आमा समूह, याञ्चोकटार आमा समूह र मित्रता माध्यमिक विद्यालयका विद्यार्थीहरुले उत्पादन गरेको फूल अहिले स्वदेशी बजारसंगै विदेशी बजारमा समेत बिक्रीवितरण सुरु हुँदा निकै उत्साहित र फूल व्यवसायले आशा जगाएको गाउँपालिका अध्यक्ष शुक्र चुमानले बताए ।
गाउँपालिकामा उत्पादित सयपत्री फूल कतार भुजेल समाज का नेता विकास भुजेलको समन्वय र पालिकाको कृषि शाखा प्रमुख सन्तोष के.सी. लगायतका टिमले गरेको सहयोग प्रति गाउँपालिका अध्यक्ष चुमानले आभार समेत प्रकट गरेका छन् ।
गाउँपालिकाबाट पहिलो चरणमा गत विहीबार तीन सय माला कतार पठाइएको अध्यक्ष चुमानले बताए । उनले भने, ‘हामीले पहिलो चरणमा प्रति माला १५० रुपैयाँका दरले तीन सय माला पठाएका छौं । समयमै बजार खोज्न सकेको भए यसै वर्षकरिब एक हजार माला कतार पठाउन सकिने रहेछ ।’
‘सयपत्री फूल कतार पुगेसंगै बजारको सम्भावना रहेको आशा जगाएको छ’, अध्यक्ष चुमानले भने, ‘अत्तर र अगरबत्ती उत्पादनका लागि सुकेको सयपत्री फूललाई कच्च पदार्थका रुपमा प्रयोग गरिदो रहेछ । अब गाउँपालिकाले बजारको खोजी गर्दै सयपत्री फूलको खेती विस्तार गरी कृषकलाई उद्यम तर्फउन्मुख गराउने सोचामा छौं ।’
नेपालमै फूल उत्पादनको सम्भावना भएपनि तिहारका समयमा भारत र अन्य देशबाट प्राकृतिक फूल र कृत्रिम फूल आयात हुन छाडेको छैन । चाडबाडमा प्रयोग हुने मखमली र सयपत्री फूल खेतीलाई थप विस्तार गर्न र कृषकलाई फूलमा आत्मनिर्भर बनाउन पहिलो पटक नेपालबाट व्यावसायिकरूपमा सुदान फ्लावरले कतारमा सयपत्री र मखमली फूल भित्र्याएको हो ।
विदेशमा पनि फूलको बजार र आम्दानीको सम्भावना प्रशस्तै भएको र नेपाल बाहिरको मिनी नेपालमा बस्ने नेपालीलाई नेपाली फूल प्रयोगमा ल्याउन लक्षित गर्दै स्वदेशी उत्पादनलाई विदेशी बजारमा पुर्याउन आँबुखैरेनी गाउँपालिका सफल भएको छ ।
आँवुखैरेनीको याञ्चोक आमा समूह, आँधीमूल आमा समूह र मित्रता माध्यमिक विद्यालयको परिसरमा गरी करिब २६ रोपनी क्षेत्रफलमा व्यावसायिक फूल खेती गरिएकोमा त्यसलाई अन्तर्राष्ट्रियकरण गर्दै कतारको बजारमा ल्याइपुर्याएको व्यवसायी अम्बिका पौडेलले बताए ।
दोहाको रिजेन्सी मार्केटमा रहेको सुदान फ्लावर पसलले तिहारको दिनबाट बिक्री वितरण शुरू हुने गरी सयपत्री फूल कतारमा भित्र्याएको छ । फूलको साइजअनुसार १ मिटरको मालाको बजार मूल्य २५ देखि ३० रियाल कायम गरिएको सुदान फ्लावरका सञ्चालक कविन्द्र कँडेलले जानकारी गराएका छन् ।
तिहारलाई मात्र लक्षित नभएर अन्य समयमा समेत नेपाली फूललाई निरन्तरता दिने उनको योजना छ । उनले भने, ‘कतारमा हुने विभिन्न कार्यक्रममा समेत फूलको प्रयोग गर्ने हो भने नेपालमा उत्पाद भएका फूल र फूलखेती किसानलाई टेवा पुग्ने हुँदा नेपाली कृषकलाई रोजगारीको खोजीमा अन्यत्र भौतारिनुपर्ने अवस्थामा आउनेछैन ।’
