नवौं छपेली कप फुटबल प्रतियोगिताको उपाधि विमलनगरको सिद्धगुफाले जित्यो
डिपि अधिकारी/डुम्रे
तनहुँको बन्दीपुर गाउँपालिका-१ छापमा सञ्चालित नवौं छपेली कप खुल्ला सेभेन ए साइड फुटबल प्रतियोगिताको उपाधि सिद्धगुफाले जितेको छ ।
गत पौष २० गतेबाट सञ्चालन गरिएको प्रतियोगिताको सोमबार भएको फाईनल खेलमा निर्धारित समय अवधिभर आयोजक छपेली युवा क्लब ए र बन्दिपुर-४ बिमलनगरस्थित सिद्धगुफा युवा क्लवले समान २-२ गोल गरेपछि खेल पेनाल्टि सुट आउटमा पुगेको थियो । पेनाल्टि सुट आउटमा ३-१ गोल अन्तरले सिद्धगुफा विजेता बनेको हो ।
प्रतियोगिताको आईतबार भएको पहिलो सेमिफाईनलमा सिद्धगुफा युवा क्लवले १७ वर्षमुनिका खेलाडी आवद्ध रहेको छपेली क्लवलाई हराएपछि सिद्धगुफाले फाईनलको यात्रा तय गरेको थियो । आयोजक छपेली ए ले न्यू बुद्धलाई हराउँदै फाईनलमा पुगेको थियो ।
च्याम्पियन बनेसंगै सिद्धगुफाले एक लाख २५ हजार १२५ रुपैयाँको साथमा ट्रफि, मेडल र प्रमाण-पत्र प्राप्त गरेको छ । प्रतियोगिताको उपविजेता आयोजक छपेलीले ६१ हजार ६१ रुपैयाँको साथमा ट्रफि, मेडल र प्रमाण-पत्र प्राप्त गरेको अध्यक्ष विजय रानाले जानकारी दिए ।
यस्तै, भेट्रन्स तर्फ काहुँ मिलन युवा क्लब झापुटार पहिलो बनेको छ । सोमबार भएको फाईनल खेलमा चाम्बास युवा क्लबलाई ४-० को फराकिलो अन्तरले हराउँदै काहुँ मिलन पहिलो बनेको हो । काहुँ मिलनले पहिलो पुरस्कार भेंडा प्राप्त गरेको छ भने दोस्रो बनेको चाम्बासले बोका पुरस्कार प्राप्त गरेको छ ।
सेमिफाइनल पुग्न सफल छपेली अण्डर सेभेन्टिन र न्यूबुद्धले नगद १०/१० हजार रुपैयाँ पुरस्कार प्राप्त गरेका छन् । सर्वोत्कृष्ट खेलाडी आयोजक छपेलीका सलिन तामाङ्ग, र्सवाधिक गोलकर्ता सिद्धगुफाका राम थापालाई जनहि नगद २ हजार ५ सय पुरस्कार प्रदान गरिएको थियो ।
बन्दीपुर-१ छाप खेल मैदानमा सोमबार भएको फाईनल प्रतियोगितामा गण्डकी प्रदेशकी सामाजिक बिकास तथा स्वस्थ्य मन्त्री शुसिला सिंखडाले सम्बोधन गर्दै राष्ट्रिय खेलाडी उत्पादन गर्न स्थानीय क्लबहरुको महत्वपूर्ण भूमिका रहने बताइन् ।
उनले भनिन्, ‘तनहुँमा खेलका गतिविधिहरु सञ्चालन गर्न प्रदेश सरकारले सहयोग गर्दै आईरहको र आगामी दिनहरुमा पनि सहयोग गर्न लागि पर्नेछु ।’ कार्यक्रममा बन्दीपुर गाउँपालिकाका अध्यक्ष सुरेन्द्र थापा, निवर्तमान अध्यक्ष पूर्णसिंह थापा, वडा नं. १ का वडा अध्यक्ष शिवकुमार श्रेष्ठ लगायतले आ-आफ्ना विचार व्यक्त गरेका थिए ।
‘सामाजिक अन्तर सम्बन्धका लागि खेलकूद’ भन्ने नाराका साथ आयोजना गरिएको फुटबल प्रतियोगिता दुइ विधामा खेलाइएको आयोजक छपेली साँस्कृतिक युवा क्लबका अध्यक्ष रानाले बताए । क्लवले स्व. बाबुराम पाटा र स्व. लालबहादुर पाटा मगरको स्मृतिमा प्रत्येक वर्ष माघे संक्रान्ति पर्वलाई लक्षित गरी फुटबल प्रतियोगिता सञ्चालन गर्दै आएको छ ।
