तनहुँमा तरकारी र धान खेतीको क्षेत्रफल विस्तार
तनहुँ : तनहुँमा व्यावसायिक तरकारी तथा धान खेतीको क्षेत्रफल विस्तार हुँदै गएको छ । राष्ट्रिय कृषि आधुनिकीकरण कार्यक्रमअन्तर्गत सञ्चालित तरकारी र धान जोन कार्यक्रमले खेती विस्तारसँगै किसानलाई संगठित गरी उत्पादनलाई व्यावसायिक बनाउन सहयोग पु¥याएको छ ।
कार्यक्रम कार्यान्वयन इकाई गोरखाका वरिष्ठ कृषि विकास अधिकृत पूर्ण ढुङ्गानाका अनुसार तनहुँमा तरकारी जोन सुरु भएयता २१८ हेक्टर र धान जोन सुरु भएयता ८५ हेक्टर खेतीयोग्य क्षेत्रफल विस्तार भएको छ । दुवै कार्यक्रममार्फत खेतीको क्षेत्रफल कुल ३०३ हेक्टर बढेको हो ।
आर्थिक वर्ष २०७५/७६ मा सुरु गरिएको तरकारी जोन कार्यक्रम अन्तर्गत प्रारम्भमा ५०५ हेक्टर क्षेत्रफल समेटिएको थियो । अहिले उक्त क्षेत्रफल बढेर ७२३ हेक्टर पुगेको छ । यस अवधिमा तरकारी खेतीको क्षेत्रफल ४३ प्रतिशतभन्दा बढीले वृद्धि भएको छ ।
त्यस्तै, आर्थिक वर्ष २०७९/८० देखि सञ्चालनमा आएको धान जोन कार्यक्रमको क्षेत्रफल पनि पाँच सय हेक्टरबाट बढेर ५८५ हेक्टर पुगेको छ । धान खेतीको क्षेत्रफलमा १७ प्रतिशत वृद्धि भएको हो ।
तरकारी जोन कार्यक्रम आँबुखैरेनी गाउँपालिका, व्यास नगरपालिका, बन्दीपुर गाउँपालिका र भानु नगरपालिकामा सञ्चालन भइरहेको छ। यस कार्यक्रम अन्तर्गत दुई सहकारी, दुई कृषक समूह र ११ कृषि उद्यमी आबद्ध छन् । कार्यक्रमबाट एक हजार ९८९ जना लाभान्वित भएको वरिष्ठ कृषि विकास अधिकृत ढुङ्गानाले जानकारी दिए ।
धान जोन कार्यक्रम व्यास नगरपालिका–८, ९ र ११, भानु नगरपालिका तथा बन्दीपुर गाउँपालिका–१ मा सञ्चालन भइरहेको छ । यसअन्तर्गत दुई सहकारी, दुई कृषक समूह र १० कृषि उद्यमी सहभागी छन् । कार्यक्रमबाट एक हजार ८३८ जना लाभान्वित भएका छन् ।
तरकारी तथा धान खेतीलाई व्यावसायिक र उत्पादनमुखी बनाउने उद्देश्यले सञ्चालित कार्यक्रमले किसान, सहकारी, कृषक समूह तथा कृषि उद्यमीलाई एउटै प्रणालीमा आबद्ध गरी कृषि गतिविधि अघि बढाउन सहयोग पुर्याएको छ । उत्पादन क्षेत्र विस्तारसँगै खेतीलाई व्यवस्थित बनाउने र कृषि उद्यममा किसानको सहभागिता बढाउने कार्यक्रमको लक्ष्य रहेको छ ।
तरकारी र धान जोन कार्यक्रमबाट हालसम्म कुल तीन हजार ८२७ जना लाभान्वित भएको तथ्याङ्क छ । खेतीको क्षेत्रफल विस्तार र किसानको सहभागिताले जिल्लामा व्यावसायिक कृषि विकासको सम्भावना बढाएको देखिए पनि उत्पादन, उत्पादकत्व र किसानको आम्दानीमा परेको प्रभाव मापन गर्न थप तथ्याङ्क आवश्यक देखिन्छ ।
