तनहुँको शुक्लागण्डकीमा भएको सडक दुर्घटनामा दुइ जनाको मृत्यु
भञ्ज्याङन्यूज
तनहुँको शुक्लागण्डकी नगरपालिकामा भएको छुट्टाछुट्टै सडक दुर्घटनामा परी दुइ जनाको मृत्यु भएको छ ।
शुक्लागण्डकी नगरपालिका-१० छाब्दी देउरालीमा बिहीबार साँझ ट्रयाक्टर र मोटरसाइकल एकआपस ठोक्किँदा एकजना महिलाको मृत्यु भएको छ ।
छाब्दी देउराली भित्री सडक खण्डमा साँखेबाट दुलेगौडातर्फआउँदै गरेको ग७प ६९२४ नम्बरको मोटरसाइकल र विपरीत दिशाबाट जाँदै गरेको ग१त ३९९४ नम्बरको ट्रयाक्टर आपसमा ठक्कर खाँदा मोटरसाइकलमा सवार शुक्लागण्डकी-१ थप्रेककी ४५ वर्षीया पीपलकौरी गुरुङको घटनास्थलमा मृत्यु भएको हो ।
जिल्ला प्रहरी कार्यालय तनहुँका प्रहरी नायब उपरीक्षक मोहनबहादुर खाँणका अनुसार ट्रयाक्टर चालक र मोटरसाइकल चालकलाई नियन्त्रणमा लिएको छ ।
यस्तै, शुक्रबार बिहान ट्याक्टर दुर्घटना हुँदा एक जनाको मृत्यु भएको छ । शुक्लागण्डकी नगरपालिका-११ कालिकोट स्थित भित्री सडक खण्डमा गाछेपानीबाट चिसापानीतर्फजाँदै गरेको ग१त २५३२ नम्बरको ट्याक्टर अनियन्त्रित भई सडकमा पल्टिएको थियो ।
प्रहरी नायब उपरीक्षक खाँणका अनुसार ट्याक्टर पल्टिई दुर्घटना हुँदा ट्याक्टरमा सवार शुक्लागण्डकी नगरपालिका-२ गाछेपानी बस्ने अन्दाजी वर्ष २४ को सोम बहादुर परियारको घट्नास्थलमै मृत्यु भएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।
