भानुमा स्थानीय तथा उन्नत जातका बोका प्रदर्शनी तथा प्रतियोगिता
भानु : तनहुँको भानु नगरपालिकामा स्थानीय तथा उन्नत जातका बोका प्रदर्शनी गरिने भएको छ । राष्ट्रिय बाख्रा दिवश–२०८१ का अवसरमा “पोसिलो आहार, बाख्रा पालनमा गुणस्तर सुधार” भन्ने नाराका साथ माघ ४ गते उक्त प्रदर्शनी गर्न लागिएको हो ।
नगरपालिकाको पशुपंछी तथा मत्स्य विकास शाखा, राष्ट्रिय बाख्रा अनुसन्धान कार्यक्रम बन्दीपुर, भेटेरिनरी अस्पताल तथा पशुसेवा विज्ञ केन्द्र तनहुँ, बरभञ्ज्याङ बाख्रा पालक समूह र नेपाल ब्यवसायीक बाख्रा पालक महासंघको संयुक्त आयोजनामा भानु–५ को स्याउली पसलमा प्रदर्शनी एवं प्रतियोगिता गर्ने तयारी गरिएको नगरपालिकाका पशुपंछी तथा मत्स्य बिकास शाखाका अमित ढुँगानाले जानकारी दिए ।
प्रदर्शनीमा प्रथम हुने बोका धनीलाई स्थानीय तथा उन्नत जात तर्फ १०/१० हजार, द्वितीयलाई ८/८ हजार, तृतीयलाई ६/६ हजार र सान्त्वना हुनेलाई ४/४ हजार रुपैंया पुरस्कारको ब्यवस्था गरिएको भानुका पशु विकास अधिकृत सुशील ऐरीले बताए ।
बोका प्रदर्शनी, बाख्राको उत्पादन परिकार प्रदर्शनी, बाख्राको सुधारिएको मलको प्रदर्शनी, मनोरञ्जन तथा साँस्कृतिक कार्यक्रम र पुरस्कार वितरण कार्यक्रम रहेको नगरपालिकाका प्रशासकीय अधिकृत सुनिल पाण्डेले बताए ।
उक्त प्रदर्शनीले कृषकहरुलाई व्यवसायीक रुपमा पशुपालन तर्फ आकर्षित गराउन मद्दत पुग्ने नगरप्रमुख आनन्दराज त्रिपाठीले विश्वास व्यक्त गरे । उनले भानुलाई मासुमा आत्मनिर्भर बनाउन समेत टेवा पुग्ने बताए ।
