होटल व्यवसायी संघ तनहुँले नयाँ वर्षमा सांगितिक साँझ गर्ने
दमौली : नयाँ वर्ष वि.सं. २०८२ का अवसरमा होटल व्यवसायी संघ तनहुँले सांगितिक साँझ गर्ने भएको छ । संघले नेपाली नयाँ वर्षको अवसर पारी चैत ३१ गते सांगितिक साँझ आयोजना गर्न लागेको हो ।
शुक्रबार पत्रकार सम्मेलन गरी संघले कार्यक्रम बारे जानकारी गराएको छ । पत्रकार सम्मेलनमा संघका निवर्तमान अध्यक्ष एवं प्रदेश उपाध्यक्ष दुर्गाविलास भट्टराईले नयाँ वर्षमा युवायुवतीलाई लक्षित गरी कार्यक्रम आयोजना गरिएको जानकारी दिए ।
विगतका वर्षमा कार्यक्रम गर्दा घाटा भएपनि निरन्तरताका लागि कार्यक्रम गर्न लागिएको बताउँदै उनले भने, ‘कार्यक्रममा र्यापर बुद्ध लामा, विवेक लामा, मन्जु सेन्ताङ र डिजे मिनी दुराको प्रस्तुती रहनेछ । कार्यक्रम सञ्चालनका लागि रु ६ लाख खर्च हुने अनुमान गरिएको छ ।’
संघका अध्यक्ष गिरबहादुर थापाले यो कार्यक्रम संघको वार्षिक कार्यक्रम जस्तौ बनेकाले घाटा बेहोरेर पनि यसलाई निरन्तरता दिइने बताए ।
नयाँ वर्षमा दमौलीमा कार्यक्रम नहुँदा युवायुवती अन्यत्र जाने अवस्था रहेकाले स्थानीय स्तरमै मनोरञ्जन गराउने अवसर सिर्जना गर्न सांगितक कार्यक्रम आयोजना गरिएको उनले बताए ।
