पर्यटकले भरिभराऊ बन्दीपुर

बन्दीपुर : तनहुँको पर्यटकीय नगरी बन्दीपुरमा पर्यटकको आगमन बढेपछि यतिबेला होटल तथा घरबासमा कोठा पाउन मुस्किल हुन थालेको छ । चाडपर्वको लामो बिदा र पर्यटकीय याम एकैपटक सुरु हुँदा बन्दीपुरमा आन्तरिक तथा बाह्य पर्यटकको चाप बढेको हो । पर्यटकको चापले बजारमा चहलपहल बढाए पनि पर्याप्त बासको व्यवस्था नहुँदा केही पर्यटक भने बन्दीपुरमै बस्न नपाई फर्किनुपर्ने अवस्था आएको छ ।
होटल तथा होमस्टेमा कोठा नपाएपछि कतिपय पर्यटक नजिकैको डुम्रे बजारसम्म पुगेर बास खोज्न बाध्य भएका छन् । पर्यटकको आगमन बढेसँगै होटल व्यवसायमा उत्साह थपिए पनि उपलब्ध पूर्वाधारले सबै पर्यटकलाई धान्न नसक्दा व्यवस्थापन चुनौतीपूर्ण बनेको व्यवसायीको भनाइ छ ।
बन्दीपुर पर्यटन विकास समितिका अध्यक्ष राजु बानियाँका अनुसार पछिल्लो समय बन्दीपुरमा पर्यटकको चाप अत्यधिक बढेको छ । होटल र घरबास भरिभराउ हुँदा बास बस्न चाहने सबैलाई कोठा उपलब्ध गराउन नसकिएको उनले बताए ।
चाडपर्वको बिदा र पर्यटकीय याम सुरु हुनु एकैपटक परेकाले पर्यटकको आगमन बढेको बानियाँले बताए । उनका अनुसार बन्दीपुरमा होटल तथा होमस्टे गरी करिब एक हजार चार सय जनालाई बास बसाउन सक्ने क्षमता छ । यहाँ करिब ८० वटा होटल र चारवटा होमस्टे सञ्चालनमा छन् ।
तर, बासको क्षमता हुँदाहुँदै पनि पानीको अभावले होटलहरूले पूर्ण क्षमतामा सेवा दिन नसकेको उनले बताए । पर्यटकको चाप बढेका बेला आवश्यक पानी उपलब्ध नहुँदा होटल सञ्चालन र सेवा व्यवस्थापनमा समेत समस्या परेको उनको भनाइ छ ।
पर्यटकको बढ्दो आगमनलाई स्थानीय पर्यटन व्यवसायको अवसरका रूपमा लिनुपर्ने भए पनि त्यसअनुसार पूर्वाधार विस्तार र व्यवस्थापन हुन नसक्दा अवसर गुम्ने जोखिम देखिएको छ । बासको व्यवस्था नहुँदा पर्यटक अन्यत्र जानुपर्ने अवस्थाले बन्दीपुरमा पर्यटकको बसाइ अवधि र स्थानीय व्यवसायले लिन सक्ने लाभमा समेत असर पर्न सक्ने व्यवसायीको चिन्ता छ ।
होटल व्यवसायी वैशबहादुर गुरुङले चाडपर्वको बिदा मनाउन परिवार तथा साथीभाइसँग आउने आन्तरिक पर्यटकको संख्या बढेको बताए । बन्दीपुर घुम्न आउने पर्यटकको चापले होटल व्यवसायमा उत्साह थपिएको भए पनि मागअनुसार कोठा उपलब्ध गराउन कठिन भएको उनले बताए ।
प्राकृतिक सौन्दर्य, ऐतिहासिक बजार, मौलिक संस्कृति र हिमश्रृंखलाको मनोरम दृश्य बन्दीपुरका प्रमुख आकर्षण हुन् । भक्तपुरे शैलीमा निर्माण गरिएका परम्परागत घर, ढुङ्गा बिछ्याइएका सडक र पुरानो बजारले बन्दीपुरलाई अन्य पर्यटकीय गन्तव्यभन्दा फरक पहिचान दिएका छन्। यही विशेषताका कारण परिवारसहित घुम्न आउने आन्तरिक पर्यटकदेखि स्थानीय जीवनशैली र संस्कृति बुझ्न चाहने विदेशी पर्यटकसम्मको रोजाइमा बन्दीपुर पर्दै आएको छ ।
बन्दीपुरमा खड्गदेवी, थानीमाई र महालक्ष्मी मन्दिर, सिद्धगुफा, मणि मुकुन्दसेन पैदलमार्ग (मिनी ग्रेटवाल), तीनधारा, टुँडिखेल, रानीवन, रामकोट, सुनखरी, मणिमुकुन्द सेन दरबार र पदम पुस्तकालयलगायतका स्थल पर्यटकका आकर्षण हुन् । गाउँपालिकाले पनि यीमध्ये विभिन्न धार्मिक, ऐतिहासिक तथा प्राकृतिक स्थललाई प्रमुख पर्यटकीय गन्तव्यका रूपमा सूचीकृत गरेको छ ।
पर्यटकको आगमनले होटल तथा रेस्टुरेन्टमा मात्र नभई होमस्टे, यातायात, स्थानीय उत्पादन र अन्य साना व्यवसायमा समेत आर्थिक गतिविधि बढाएको छ । तर, पर्यटकको संख्या बढ्नु मात्रै पर्यटन विकासको पर्याप्त आधार नहुने देखिएको छ । पर्यटकलाई सहज बास, खानेपानी र गुणस्तरीय सेवा उपलब्ध गराउन सके मात्रै बढ्दो आगमनलाई स्थानीय अर्थतन्त्रसँग जोड्न सकिनेछ ।
बन्दीपुरको बढ्दो लोकप्रियतासँगै अब पर्यटकको संख्या बढाउने मात्र होइन, उनीहरूलाई सहज रूपमा बस्ने वातावरण बनाउने चुनौती पनि थपिएको छ । विशेषगरी खानेपानीको दीर्घकालीन व्यवस्थापन, होटलको सेवा क्षमता विस्तार र पर्यटकमैत्री पूर्वाधार विकासमा ध्यान दिन सके बन्दीपुरको पर्यटनले थप गति लिन सक्ने देखिन्छ ।










