जेन–जीले भन्यो : ‘आन्दोलनमा घुसपैठ भयो’, संसद् भवनभित्रै प्रवेशको प्रयास कुन समूहले गर्यो ?
काठमाडौँ : ‘जेन–जी मुभमेन्ट’ ले शान्तिपूर्ण आन्दोलनमा राजनीतिक स्वार्थ बोकेका व्यक्तिहरू घुसपैठ भएको दाबी गरेको छ । जेन–जी अभियन्ता आजका लागि सडकबाट फर्किसक्दा पनि बानेश्वरको सडकमा भने हिंसा जारी देखिन्छ ।
शान्तिपूर्ण आवाजलाई तोडफोड र संसद् भवनतर्फ जबर्जस्ती प्रवेशको प्रयासले आन्दोलन प्रभावित बनाएको विज्ञप्तिमार्फत ‘जेन–जी मुभमेन्ट’ ले भनेको छ । ‘संसद् भवन हाम्रो शत्रु होइन, संसद् हाम्रो सम्पत्ति हो, जनताको पसिना र करले बनेको संस्था हो,’ जेन–जीको विज्ञप्तिमा भनिएको छ ।
‘जेन–जी मुभमेन्ट’ ले संसद् भवन घेर्ने वा त्यसमाथि आक्रमण गर्ने कुनै योजना नरहेको तथा आन्दोलन शान्तिपूर्ण गर्ने तयारी रहेको भनिरहँदा आखिर कसले मचायो त हिंसा ? संसद् भवनभित्रै प्रवेशको प्रयास कुन समूहले गर्यो ?
जेन–जीको मुभमेन्टलाई माइतीघरदेखि बानेश्वरसम्मको क्षेत्रमा प्रदर्शनको स्थान प्रशासनले तोकेको थियो । जेन जीहरू बिहान १० बाट माइतीघरमा जम्मा भएर बानेश्वरतिर लागेका थिए । बानेश्वरमा निषेधित क्षेत्रभित्र प्रवेश गर्ने तथा आन्दोलनका लागि पूर्व निर्धारित गरिएको भन्दा फरक तीनकुने क्षेत्रबाट प्रदर्शनकारीहरू संसद् भवनतर्फ प्रवेश गरेका थिए । तर यी दुई समूहलाई रणनीतिक रूपमा व्यवस्थापन गर्न गृह प्रशासन पूर्णतः असफल भएको थियो ।
जेन जी आन्दोलनले आफूलाई कुनै पनि राजनीतिक दलबाट अलग्गै रहन दिन आह्वान गरिरहँदा पनि दुर्गा प्रसाईंदेखि रास्वपासम्मले जस लिन होडबाजी गरेका थिए । प्रसाईंले आन्दोलनमा आउन खोजेपछि जेन जी अभियन्ताले उनकै घरमा गएर सम्झाउनु परेको थियो ।
त्यस्तै सहकारी ठगीमा सर्वोच्च अदालतसमेतको आदेशमा जेलमा रहेका रवि लामिछानेले पनि जेलबाटै सार्वजनिक पत्र लेखेर जस लिन खोजेका थिए । रास्वपाकै नेता गणेश कार्कीदेखि रास्वापा केही सासंदको निजी सचिवालयमा आबद्ध व्यक्ति पनि जेन जीको प्रर्दशनमा देखिएका थिए । त्यस्तै संसद् भवनको पर्खालमाथि चढ्ने युवा माओवादीका वाईसीएल नेता भएको पनि खुलासा भएको छ ।
भ्रष्टाचार र सामाजिक सञ्जालमा लगाइएको प्रतिबन्धको विरोधमा बिहान शान्तिपूर्ण ढंगले अझ प्रहरीलाई फूल दिएर सुरु भएको आन्दोलन घुसपैठले हिंसात्मक बन्न पुगेको हो । त्यही बहानामा सरकार असंवेदनशील भएर सरकारले अत्यधिक बल प्रयोग गर्दा दर्जन बढी युवाहरूको ज्यान गएको छ ।
आन्दोलनका आह्वानकर्ता तथा प्रत्यक्षदर्शीहरूले पनि बाहिरिया घुसपैठ भएको बताइरहेका छन् । आन्दोलनमा मृत्यु हुने र घाइतेहरुको संख्या थपिँदै गएको छ । प्रहरीको सेन्ट्री पोस्टदेखि यातायात विभाग अघि थोपारिएको खानेपानी पाइप मात्रै नभएर बानेश्वरको सशस्त्र प्रहरीको एम्बुलेन्समा समेत आगलागी गरिएको छ ।
द्वन्द्वात्मक मनसाय बोकेका मानिसहरूले आन्दोलनलाई अशान्ति र तोडफोडतर्फ तानेको जेन जीको दाबी छ । ‘अशान्ति र तोडफोडतर्फ तान्नेहरू राजनीतिक स्वार्थ बोकेर आएका परिचालित व्यक्तिहरू हुन् । उनीहरूले हाम्रो मर्म र आत्मालाई प्रतिनिधित्व गर्दैनन्,’ जेन जी आन्दोलनले विज्ञप्तिमार्फत भनेको छ ।
