दूध उत्पादनमा प्रोत्साहन : भानुले कृषकलाई प्रति लिटर ५ रुपैयाँ अनुदान दिने
भानु : तनहुँको भानु नगरपालिकाले स्थानीय किसानलाई दूध उत्पादनमा प्रोत्साहन गर्ने उद्देश्यले प्रति लिटर ५ रुपैयाँ अनुदान दिने भएको छ। आर्थिक वर्ष २०८२/०८३ को स्वीकृत कार्यक्रम अन्तर्गत नगरपालिकाभित्रका दुग्ध उत्पादक कृषकलाई उत्पादनका आधारमा उक्त अनुदान प्रदान गरिने भएको हो।
नगरप्रमुख आनन्दराज त्रिपाठीका अनुसार उत्पादनमा आधारित अनुदान कार्यक्रमले कृषकलाई उत्साहित बनाउने विश्वास गरिएको छ । ‘यस्ता कार्यक्रमले दूध उत्पादन वृद्धि हुनुका साथै नगरपालिकालाई दूध, मासु, माछा र अण्डामा आत्मनिर्भर बनाउने दिशामा टेवा पुग्नेछ’, उनले बताए ।
अनुदान कार्यक्रमका लागि नगरपालिकाको पशुपंक्षी तथा मत्स्य विकास शाखाले यही चैत २ गते प्रस्ताव आह्वान गरिसकेको छ। दुग्ध उत्पादन गर्ने संस्था तथा दुग्ध कारोबार गर्ने सहकारीहरूले १५ दिनभित्र आवश्यक कागजातसहित आवेदन दिन नगरपालिकाले अनुरोध गरेको छ ।
यस कार्यक्रममार्फत स्थानीय स्तरमै उत्पादन बढाई कृषकको आम्दानी वृद्धि गर्नुका साथै कृषि क्षेत्रलाई व्यवसायिक बनाउने लक्ष्य राखिएको नगरपालिकाले जनाएको छ ।
