बन्दीपुर अस्पतालमा अतिरिक्त ओपीडी सेवामा बढ्दो आकर्षण
बन्दीपुर : तनहुँको बन्दीपुर गाउँपालिका अन्तर्गत रहेको बन्दीपुर अस्पताल मा सञ्चालन भइरहेको विस्तारित ओपीडी सेवाप्रति सेवाग्राहीको आकर्षण बढ्दै गएको छ ।
अस्पतालले सार्वजनिक बिदा र शनिबारसमेत हरेक दिन बिहान ७ बजेदेखि बेलुकी ८ बजेसम्म निःशुल्क ओपीडी सेवा प्रदान गर्दै आएको छ । सोही सेवाअन्तर्गत फाल्गुन महिनामा कुल १ हजार ८१८ जना सेवाग्राहीले ओपीडी सेवा लिएको अस्पतालका प्रमुख डा. अनिल गिरीले जानकारी गराए ।
अस्पतालका अनुसार उक्त अवधिमा नियमित समयमा सेवा लिने सेवाग्राही ७०५ जना (३८.७८ प्रतिशत) रहेका छन् भने अतिरिक्त समयमा सेवा लिने सेवाग्राहीको संख्या १ हजार ११३ (६१.२२ प्रतिशत) पुगेको छ।
नियमित ओपीडी सेवा समय बिहान १० बजेदेखि दिउँसो २ बजेसम्म हुने गरेको छ भने अतिरिक्त सेवा बिहान ७ बजेदेखि १० बजेसम्म र दिउँसो २ बजेदेखि बेलुकी ८ बजेसम्म सञ्चालन हुँदै आएको छ । सार्वजनिक बिदाका दिनसमेत बिहान ७ बजेदेखि बेलुकी ८ बजेसम्म सेवा उपलब्ध गराइएको छ ।
फाल्गुण महिनामा १४ दिन सार्वजनिक बिदा परेकाले अतिरिक्त समयमा सेवा लिने सेवाग्राहीको संख्या उल्लेख्य रूपमा बढेको अस्पतालले जनाएको छ ।
अस्पतालले कर्मचारी, विद्यार्थी, मजदुर, व्यवसायी तथा गृहिणीलाई लक्षित गर्दै सेवा समय विस्तार गरेपछि सेवाप्रवाह सहज भएको र यसले स्थानीयस्तरमा स्वास्थ्य सेवाको पहुँच विस्तारमा टेवा पुगेको विश्वास गरिएको छ ।
