९८ वर्षीय वृद्धले लगाए कोभिड-१९ विरुद्धको खोप
- भञ्ज्याङ समाचारदाता (दमौली)
कोभिड-१९ विरुद्धको खोप अभियानको पाँचौ दिन आइतबार ९८ वर्षीय वृद्धलाई कोभिड-१९ विरुद्धको खोप लगाइएको छ । तनहुँको देवघाट गाउँपालिकाका ९८ वर्षीय वृद्ध अगमप्रसाद लामिछानेलाई देवघाट स्वास्थ्य कार्यालयले सञ्चालन गरेको खोप केन्द्रमा उक्त खोप लगाइएको हो । देवघाट क्षेत्र विकास समिति अन्तर्गतको समाजकल्याण केन्द्र ज्येष्ठ नागरिक आश्रममा बस्दै लामिछानेलाई कोभिडविरुद्धको खोप लगाइ देवघाट गाउँपालिकामा खोप अभियान सुरु गरिएको गाउँपालिकाका स्वास्थ्य शाखाका प्रमुख प्रदीपकुमार बुढाथोकीले बताएका छन् ।
बृद्धाश्रममा बस्ने ज्येष्ठ नागरिक अधिकांश ८० वर्ष माथिका छन् । बृद्धबृद्धाहरु दैनिक विभिन्न व्यक्तिले उपलब्ध गराउने भोजन ग्रहण गर्ने र कोभिडको निकै जोखिममा पर्ने भएका कारण सबैभन्दा पहिला बृद्धबृद्धालाई कोभिड खोप लगाइएको बुढाथोकीले बताए ।
बृद्धाश्रममा बस्ने ३४ जना बृद्धबृद्धा, १३ जना आश्रमका कर्मचारी, ५० जना महिला स्वास्थ्य स्वयं सेवीका र स्वास्थ्यकर्मी, ३ जना सरसफाईकर्मी, ३ जना नगर प्रहरी १ जना एम्बुलेन्स चालक गरी १०४ जनालाई कोभिड विरुद्धको खोप लगाइएको स्वास्थ्य शाखाले जनाएको छ ।
जिल्ला स्वास्थ्य कार्यालयका अनुसार माघ १९ गतेसम्म जिल्लाका १ हजार ६७९ स्वास्थ्यकर्मीलाई खोप लगाउने लक्ष्य छ । व्यास नगरपालिकाका ५५८, म्याग्दे गाउँपालिकाका ८२, ऋषि गाउँपालिकाका ९८, शुक्लागण्डकी नगरपालिकाका २६७, भिमाद नगरपालिकाका १७७, घिरिङ गाउँपालिकाका ६१, भानु नगरपालिकाका १७१, आँवुखैरेनी गाउँपालिकाका ७३, बन्दिपुर गाउँपालिकाका १०५ र देवघाट गाउँपालिकाका ८७ जना स्वास्थ्यकर्मीलाई खोप लगाइदैछ ।
