तनहुँका विद्यार्थीले अझै पुरा पाठ्यपुस्तक पाउन सकेनन्
भञ्ज्याङ न्यूज
तनहुँका सामुदायिक विद्यालयमा पठनपाठन गर्ने विद्यार्थीहरुले अझै पुरा मात्रमा पाठ्यपुस्तक पाउन सकेका छैनन् । नयाँ शैक्षिक सत्र सुरु भएको दुइ हप्ता बितिसकेपनि जिल्लामा अझै प्रयाप्त मात्रमा पाठ्यपुस्तक आएपुगेका छैनन् ।
सबै विषयका पाठ्यपुस्तक पाउन नसक्दा बालबालिकाको पठनपाठनमा समस्या देखिन थालेको छ । तनहुँको व्यास नगरपालिका-१ जलदेवी माध्यमिक विद्यालयको कक्षा ९ मा पढ्ने अर्पना पन्थ विद्यालय जान थालेको २ साता भइसकेको छ । उनले अहिलेसम्म ४ विषयका मात्रै किताब किन्न पाएकी छन् । बाँकी ५ वटा किताब बजारमा नपाएको उनको गुनासो छ ।
पुस्तक नपाउँदा पढ्न समस्या भएको उनले सुनाइन । ‘सबै किताब नपाउँदा स्कुलमा राम्रोसँग पढाइ भएको छैन, घरमा पनि पढ्न पाइएन,’ उनले भनिन् ।
समस्या उनको मात्रै होइन । धेरै विद्यार्थी किताब नपाएर हैरान छन् । ‘कक्षा ९ मा पाठ्यक्रम नफेरिएको भए दिदी-दाइका पुराना किताब मागेर पढ्न हुन्थ्यो,’ उनले भनिन्, ‘मसँग अकाउन्ट, कम्पलसरी म्याथ, अप्सनल म्याथ र व्याकरण गरी ४ वटा विषयका पुस्तक छन । अरू साथीहरूसँग त त्यो पनि छैन ।’
पुस्तक पर्याप्त नहुँदा एउटैलाई ४/५ जनासम्मले पालो गरेर पढ्नु परिरहेको कक्षा ८ की निकिता दुलालले सुनाइन् । पुस्तक नहुँदा गृहकार्य गर्न पनि मुस्किल भइरहेको कक्षा ७ का किरण बस्नेतले गुनासो गरे । ‘कक्षामा सरहरूले कता-कताबाट पढाउनुहुन्छ अनि होमवर्क दिनुहुन्छ । घर गएपछि उत्तर कहाँबाट खोजेर लेख्ने -‘ उनको प्रश्न छ ।
नयाँ शैक्षिक शत्र सुरु भएसँगै जिल्लाका अधिकांश विद्यालयमा जेठको पहिलो साता पठनपाठन सुरु गरिएको छ । तर, पर्याप्त पुस्तक नहुँदा पढाउन समस्या आएको शिक्षकहरूले बताए ।
पछिल्लो २ वर्षकोरोना महामारीका कारण शैक्षिक क्यालेन्डर खलबलिएको छ । यो वर्षपनि ढिला सुरु भएको शैक्षिक सत्रमा विषयगत पुस्तक पर्याप्त उपलब्ध नहुँदा सिकाइमा प्रभाव परेको भानु-१३ ठूलोढुंगास्थित अरनिको माविका प्रधानाध्यापक शैलेन्द्रकुमार शाहले बताए ।
‘नयाँ पाठ्यक्रमअनुसार पुस्तक उपलब्ध नहुँदा अनलाइनबाट पुस्तक डाउनलोड गरी पढाउँदै छौं,’ उनले भने । सरकारले कक्षा ४, ७ र ९ मा नयाँ पाठ्यक्रम लागू गरेको छ ।
जिल्लामा आवश्यकमध्ये हालसम्म २५ प्रतिशत मात्र पाठ्यपुस्तक आइपुगेको पुस्तक व्यवसायीहरू बताउँछन् । जिल्लामा ४४१ सामुदायिक र १३४ संस्थागत विद्यालय छन् ।
