व्यासले व्यवसाय करमा सहजिकरण गर्ने, इट्टा उद्योग कार्यविधि पारित
भञ्ज्याङ न्यूज
तनहुँको व्यास नगरपालिकाले व्यवासयको कर व्यवस्थापनमा सहजीकरण गर्ने भएको छ । नगरपालिका भित्रका व्यवसायको कर व्यवस्थापन सहजीकरणका लागि वडा नं. २ का वडाध्यक्ष काशीराम श्रेष्ठको संयोजकत्वमा वडा नं. १ का वडाध्यक्ष खरसिं दरै, वडा नं. ३ का अध्यक्ष प्रेमकुमार श्रेष्ठ र वडा नं. ४ का वडाध्यक्ष विश्व न्यौपाने कार्यकारिणी सदस्य रहने गरी समिति गठन गरेको छ ।
उक्त समितिमा नगरपालिकाका कल्पना पोख्रेल, दमौली बजार इकाइ प्रतिनिधि र सदस्य सचिवमा राजश्व शाखाका अर्जुन श्रेष्ठलाई तोक्ने निर्णय नगर कार्यपालिकाको आइतबार बसेको नियमित बैठकले निर्णय गरेको छ । नगरप्रमुख बैकुण्ठ न्यौपानेको अध्यक्षतामा बसेको बैठकले यही चैत्र ६ गते कार्यपालिका बैठकमा भएको निर्णयहरुको समीक्षा समेत गरेको छ ।
यस्तै, नगरपालिकाको स्थापना दिवस यही चैत्र ३० गते मनाउने सम्बन्धमा आमन्त्रण, प्रकाशनको र व्यवस्थापन तयारीमा प्रगति समीक्षा गर्नुका साथै पूर्व सभामुख रामचन्द्र पौडेललाई प्रमुख अतिथि बनाउने निर्णय बैठकले गरेको नगरका प्रवक्ता एवं वडा नं. ५ का वडाध्यक्ष मोहनकुमार श्रेष्ठले जानकारी गराएका छन् ।
त्यस्तै, कार्यपालिका बैठकले भूमिहीन दलित, भूमिहीन सुकुमबासी, अव्यवस्थित बसोबासीहरुको तथ्याङ्क संकलन गर्ने कार्यमा खटिएका तथ्याङ्क संकलकहरुलाई धन्यावद ज्ञापन गरेको छ । वडागत संकलित फाराम नगरपालिकामा जम्मा गरी आयोगमा प्रबृष्ट गर्न आवश्यक बढीमा ४ जना कर्मचारीलाई कामको अवधिभर काममा लगाउने व्यवस्था गरिने बएको बताइएको छ ।
कार्यपालिका बैठकले स्थानीय सरकार सञ्चालन ऐनले निर्दिष्ट गरेको अधिकार भित्र रही व्यास नगरपालिका भित्र सञ्चालित घरेलु इट्टा उद्योग सञ्चालन सम्बन्धी कार्यविधि, २०७७ समेत पारित गरेको प्रवक्ता श्रेष्ठले जानकारी गराएका छन् ।
