शुक्लागण्डकी नगरपालिकाद्वारा अपाङ्गता परिचयपत्र वितरण

तनहुँको शुक्लागण्डकी नगरपालिकाले थप ८ जनालाई अपाङ्गता परिचय पत्र प्रदान गरेको छ । अपाङ्गता परिचयपत्र वितरण सम्बन्धी कार्यविधि २०७६ अनुसार क वर्गका तीन जना, ख बर्गका तीन जना र ग वर्गका २ गरी ८ जनालाई परिचयप्रत्र वितरण गरिएको शुक्लाण्डकी नगरपालिकाकी सामाजिक विकास शाखा प्रमुख हिमा पोख्रेलले जानकारी दिइन् ।

निर्देशिका बमोजिम पुर्ण अशक्त भएकाहरु क वर्ग, अति अशक्त ख वर्ग, मध्यम अशक्त ग वर्ग र सामान्य अपाङ्गता भएकाहरुलाई घ वर्गमा समेटिने र क वर्गमा पर्नेहरुलाई रातो, ख वर्गकालाई निलो, ग वर्गकालाई पहेलो र घ वर्गकालाई सेतो रंगको परिचय प्रदान गरिएको पोख्रेलले बताइन् ।

उनका अनुसार क वर्गमा पर्नेहरुलाई सरकारले मासिक चार हजार रुपैयाँ भत्ता उपलब्ध गराउँदै आएको छ भने ख वर्गकालाई २ हजार ६६० रुपैयाँ भत्ता दिने गरेको छ । ग र घ वर्गको परिचयपत्र प्राप्त गरेकाहरुलाई लोक सेवा आयोगमा छुट्टै आरक्षण कोटाको व्यवस्था र सरकारी सेवा तथा उपचारमा सहुलियतको व्यवस्था समेत गरेको छ ।

पोख्रेलले नगरपालिकासम्म आउन नसक्नेको घरमै पुगेर परिचयपत्र समेत प्रदान गरिने बताइन् । उनका अनुसार शुक्लागण्डकी नगरपालिकामा रातो कार्ड पाउने १६७ जना, निलो कार्ड पाउने २६८ जना, पहेँलो कार्ड पाउने १४५ र सेतो कार्ड पाउने ८२ गरी कुल ६ सय ६२ जनाले अपाङ्गता परिचयपत्र लिएका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर