आँवुखैरेनीमा स्थानीय तह स्तरीय विद्यार्थीका लागि सिर्जनात्मक लेखन कार्यशाला

आँवुखैरेनी : सामाजिक विकास कार्यालय तनहुँले आँबुखैरेनी गाउँपालिकामा सोमबार स्थानीय तह स्तरीय विद्यार्थीका लागि सिर्जनात्मक लेखन कार्यशाला–२०८१ कार्यक्रम गरेको छ । बालबालिकामा रहेको अन्तरनिहत प्रतिभालाई उजागर गर्दै सिर्जनात्मक लेखनलाई प्रोत्साहन दिने उद्देश्यले उक्त कार्यक्रम आयोजना गरिएको हो ।

रामशाह माध्यमिक विद्यालयमा आयोजित उक्त कार्यक्रममा सामाजिक विकास कार्यालय तनहुँका प्रमुख बिदुर हरि आर्चाय, आँबुखैरेनी गाउँपालिका अध्यक्ष शुक्र चुमानले कार्यक्रमका विषयमा आ–आफ्ना विचार व्यक्त गरेका थिए ।

कार्यशालामा आँबुखैरेनी गाउँपालिकाभित्रका विभिन्न ९ वटा सामुदायिक विद्यालयका ४१ जना विद्यार्थीहरूले भाग लिएको कार्यक्रममको मुख्य उद्देश्य विद्यार्थीहरूको सिर्जनात्मक लेखनको क्षमता विकास गर्नु रहेको आँवुखैरेनी गाउँपालिकाकी शिक्षा अधिकारी निर्मला कुवाँरले बताइन् ।

यस कार्यक्रमले विद्यार्थीहरुको विचारशक्ति र सिर्जनात्मकता मञ्चमा ल्याउने अवसर प्रदान गरेको उनले बताइन् । उनले भनिन्, ‘सिर्जनात्मक लेखनले विद्यार्थीहरूलाई मात्र शिक्षा प्राप्त गर्नका लागि नभई सोच्न र अभिव्यक्त गर्नका लागि पनि एक महत्वपूर्ण माध्यमको रूपमा प्रस्तुत गरेको छ ।’

कार्यक्रममा गाउँपालिका अध्यक्ष चुमानले भने, ‘हामीलाई गर्व छ कि यस कार्यक्रम मार्फत हाम्रो गाउँपालिका भित्रका विद्यार्थीहरूले आफ्नो लेखन क्षमतामा वृद्धि गर्न पाए । यसले उनीहरूको भविष्यमा सकारात्मक प्रभाव पार्ने छ र हामीले भविष्यमा पनि यस्ता कार्यक्रमहरूको आयोजना गर्दै जानेछौं ।’

यस्तै, सामाजिक विकास कार्यालय तनहुँका प्रमुख बिदुर हरि आर्चायले सिर्जनात्मक लेखनका कार्यक्रमहरू बालबालिकाका सिर्जनात्मक क्षमता र आत्मविश्वासमा वृद्धि गर्न महत्वपूर्ण रहेको बताए । उनले विद्यार्थीहरूको प्रतिभालाई प्रोत्साहन गर्दै यस प्रकारका कार्यक्रमलाई निरन्तरता दिनुपर्ने आवश्यकता औंल्याए ।

कार्यक्रममा गाउँपालिका उपाध्यक्ष दुर्गा अर्याल, प्रमुख प्रशासकीय अधिकृत विष्णु प्रसाद शर्मा, आँबुखैरेनी गाउँपालिका शिक्षा, युवा तथा खेलकुद शाखा प्रमुख निर्मला कुँवर, आँबुखैरेनी क्याम्सका निवर्तमान क्याम्पस प्रमुख वावुराम देवकोटा र रामशाह माविका प्रधानाध्यापक प्रेमराज लामिछाने लगायतले आ–आफ्ना विचार व्यक्त गरेका थिए ।

यस कार्यक्रममा विभिन्न कक्षाका विद्यार्थीहरूले सिर्जनात्मक लेखनमा आफ्नो सीप र विचार प्रस्तुत गरेका थिए भने लक्ष्मी माध्यमिक विद्यालय प्युघरको कक्षा–१० का विद्यार्थी प्रवेश आलेले प्रथम स्थान प्राप्त गरेका थिए । उनलको लेखनलाई विशेष सम्मान प्रदान गर्दै पुरस्कार स्वरूप प्रमाणपत्र र सम्मान प्रदान गरिएको थियो ।

उक्त कार्यक्रमले विद्यार्थीहरूको लेखन क्षमता र विचारशीलतालाई नयाँ दिशा प्रदान गर्ने अवसर दिएको छ । सहभागी विद्यार्थीहरूले कार्यक्रमको दौरान सिर्जनात्मक लेखनका नयाँ नयाँ विधिहरू र सीपहरूका बारेमा जानकारी प्रदान गरिएको थियो । जसले भविष्यमा उनीहरूको लेखन क्षमतालाई अझ सुदृढ पार्ने विश्वासिलो वातवारण बनाएको गाउँपालिकाका प्रमुख प्रशासकीय अधिकृत विष्णुप्रसाद शर्माले बताए ।

यस प्रकारका कार्यक्रमहरूले स्थानीय स्तरमा विद्यार्थीहरूको प्रतिभा र सृजनशीलता उजागर गर्न महत्वपूर्ण भूमिका निर्वाह गर्ने र जसले आगामी दिनहरूमा समाजको विकासमा महत्वपूर्ण योगदान पु¥याउने उनले बताए ।