लापरवाहीले तनहुँमा बढ्यो कोरोना संक्रमण, संक्रिय संक्रमितको संख्या पाँच सय

तनहुँको पछिल्लो केहीदिन यता दैनिक कोरोना भाइरस संक्रमितको संख्या बढ्दै गएको छ । गत असार पहिलो सातादेखि निषेधाज्ञा खुकुलो गराएसंगै समुदायस्तरबाट भएको लापर्वाहीका कारण कोरोना संक्रमितको संख्या बढ्दै गएको बताउन थालिएको छ । स्वास्थ्य सुरक्षाका मापदण्ड नअप्नाइ भिडभिडजन्य गतिविधि बढ्न थालेपछि अहिले दैनिक संक्रमितको संख्या थपिदै गएको स्वास्थ्य कार्यालय तनहुँले जनाएको छ ।

नागरिकस्तरबाट भएको लापर्वाहीका कारण कोरोना संक्रमण फैलिने जोखिम बढेको दमौली अस्पतालका मेडिकल सुपरिटेन्डेन्ट डा. सुनिल पौड्यालले बताए । उनले भने, ‘अब झन तेस्रो लहर कोरोना संक्रमणको खतरा छ । नागरिकबाट स्वास्थ्य सुरक्षाका सावधानी अपनाउन लापरवाही गरे संक्रमण अझ फैलने खतरा देखिएको छ ।’ गत शनिबारमात्रै जिल्लाका ९६ जनामा कोरोना संक्रमण देखिएको थियो । त्यस्तै आइतबार १७ जनामा संक्रमण देखिएको छ । यहि अनुपातमा कोरोना संक्रमितको संख्या बढ्दै गए जिल्लाका आइसोलेशन तथा कोभिड अस्पतालले थाम्न नसक्ने स्थिति सृजना हुन सक्ने भन्दै डा. पौड्यालले सचेत बन्न आग्रह गरेका छन् ।

‘अहिले मौसमका कारण देखिएको भाइरल ज्वारो भन्दा पनि कोरोना संक्रमणको डर धेरै छ’, उनले भने, ‘तेस्रो लहरको कोरोना संक्रमणको जोखिममा बालबालिकाहरुमा धेरै छ । हामी सुरक्षित रहन सके बच्चाहरुलाई पनि सुरक्षित गर्न सकिन्छ । त्यसैले लापरवाहीपूर्ण गतिविध नगरी स्वास्थ्य सुरक्षाका मापदण्ड पालनामा सचेत बन्नुपर्छ ।’

गत बैशाख १ गते यता ५ हजार ८३७ जनाको पीसिआर प्रविधि र ५ हजार ६८२ जनाको ऐन्टिजिनबाट परीक्षण गर्दा ४ हजार ४३६ जनामा संक्रमण देखिएको थियो । संक्रमित मध्ये ३ हजार ८४२ जना निको भएका छन् भने जिल्लामा अहिले ४९९ जना संक्रिय संक्रमित रहेको स्वास्थ्य कार्यालय तनहुँका प्रमुख शंकरबाबु अधिकारीले बताए ।

‘जनस्तरबाट बढि नै लापरवाही भएको देखिन्छ’, उनले भने, ‘आजकल बजारमा व्यक्तिहरु हिड्दा मास्क लगाउनै छाडे, भौतिक दुरी कायम गर्नै छाडेका छन् । पछिल्लो समय कोरोनालाई सामान्य तरिकाले लिइदिंदा संक्रमित संख्या बढ्दै गएको छ । यसरी नै संक्रमणको दर बढ्दै गए पुनः कडा लकडाउन गर्नुपर्ने अवस्था नआउला भन्न सकिदैन ।’

जिल्लाको व्यास नगरपालिका, शुक्लागण्डकी नगरपालिका, भिमाद नगरपालिका र म्याग्दे गाउँपालिका कोरोना संक्रमणको रेड जोनमा रहेको प्रमुख अधिकारीले बताए । उनले भने, ‘यी पालिकामा कोरोना संक्रमणको दर बढ्दै गएको छ ।’

सक्रिया संक्रमितमध्ये १० जना आइसोलेशनमा, ३ जना आइसीयु कक्ष, ६ जना एचडियु कक्षमा उपचारत छन् भने ४८१ जना होम आइसोलेशनमा बसेको कार्यालयले जनाएको छ । वैशाख १ गते यता कोरोना संक्रमणका कारण ९५ जनाको मृत्यु भएको छ ।

भानुमा १५, व्यासमा १९२, शुक्लागण्डकीमा १५६, भिमादमा ३०, म्याग्देमा ३४, घिरिङमा २, रिसिङमा २, देवघाटमा २५, बन्दिपुरमा २२, आँवुखैरेनीमा २१ जना सक्रिय संक्रमित रहेको स्वास्थ्य कार्यालयले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर