आदिकवि भानुभक्त क्याम्पका प्रमुख हड्खले सम्मानित
- भञ्ज्याङ समाचारदाता (दमौली)
कोभिड-१९ संक्रमणका समयमा नियन्त्रण र रोकथामका लागि विशेष भूमिका खेलेको भन्दै व्यास-१ स्थित आदिकवि भानुभक्त क्याम्पस दमौलीका प्रमुख महाप्रसाद हड्खलेलाई सम्मान प्रदान गरिएको छ ।
शिक्षा र विकासका क्षेत्रमा कार्यरत संस्था फोकस नेपालले देशभरका शैक्षिक संस्थाका प्रमुख मध्ये हड्खलेलाई सम्मान गरेको हो । प्रथम उपराष्ट्रपति परमानन्द झाले राजधानीमा आयोजित एक कार्यक्रममा हड्खलेलाई सम्मान पत्रका साथ सम्मान गरेका हुन् ।
प्रमुख हड्खलेसँगै स्थानीय सकारका प्रमुख, महिला अगुवा तथा समाजका विविध क्षेत्रका १२ जनालाई सम्मान गरिएको छ । कोभिड संक्रमणका समयमा आदिकवि भानुभक्त क्याम्पसमा आइसोलेसन तयार पारिएको थियो । त्यसको व्यवस्थापनमा उनी प्रत्यक्ष संलग्न थिए । आइसोलेसन व्यवस्थापनकै क्रममा छतबाट खसेर प्रमुख हड्खले झण्डै एक महिना बिरामी समेत परेका थिए ।
