गाउँपालिका र जिससको साझेदारीमा वडा कार्यालय भवन निर्माण
भञ्ज्याङ न्यूज
देवघाट गाउँपालिका र जिल्ला समन्वय समितिको साझेदारीमा देवघाट-२ को वडा भवन निर्माण गरिएको छ । जिससको ४० लाख रुपैयाँ र गाउँपालिकाको ४० लाख रुपैयाँ गरी कूल ८० लाख रुपैयाँ लागतमा वडा भवन निर्माण गरिएको हो । स्थानीय रामचन्द्र थापाले करिब आठ लाख रुपैयाँ मूल्य बराबरको चार रोपनी जग्गा दान गरेपछि भवन निर्माण गरिएको वडाध्यक्ष पोलबहादुर आलेले जानकारी दिए । स्थानीय समाजसेवी जमिनदार थापाले वडा भवन निर्माणका लागि जग्गा दान गरेपछि भवन निर्माणपश्चात सेवाग्राहीलाई सेवा प्रवाहमा सहज भएको उनले बताए ।
वडा कार्यालयसम्म विद्युत् सेवा नपुगेकाले सोलार जडान गरी कार्यालयको कामकाज सञ्चालन गर्दै आइएको छ । उनले भने, ‘विद्युत्को पहुँच वडा कार्यालयसम्म पुग्न करिब एक किलोमिटर दूरी बाँकी रहेको छ।’ साविकको कोटा गाविसका वडा नं ४, ५, ६ र ७ साविकको बैदी गाविसको वडा नं ४, ५, ६, ७, ८, ९ वडा गरी १० वटा दुर्गम वडा गाँभेर हालको देवघाट-२ नं. वडा बनाइएको छ । गाउँपालिकाका वडामध्ये २ नं वडा दुर्गममा पर्दछ ।
उनले भने, ‘सेवा लिन आउने सेवाग्राहीले एक दिन नै बिताउनुपर्ने बाध्यता रहेको छ ।’ वडा कार्यालयसम्म सडकको पहुँच पुगे पनि विद्युत् पहुँच पुग्न करिब एक किलोमिटर दूरी छ । हाल वडाको कामकाज सोलारपावर जडान गरी सञ्चालन गर्दै आइएको वडाध्यक्ष आलेले बताए । वडाका सबै क्षेत्रका बासिन्दालाई मध्यबिन्दु पर्ने गरी वडा कार्यालय स्थापना गरिए पनि भौगोलिक विकटताका कारण सेवाग्राहीले सेवा लिन कठिनाइ भोग्नुपरेको छ । सबै क्षेत्रमा सडक सञ्जाल नपुगेकाले कम्तीमा चार घण्टादेखि साढे पाँच घण्टासम्म हिँडेर वडामा आएर सेवा लिनुपर्ने दयनीय अवस्था छ ।
