पूर्कोट सेवा समाजद्वारा उत्कृष्ट विद्यार्थीलाई पुरस्कृत

पूर्कोट सेवा समाजले भानु नगरपालिका वडा नं. ८, ९ र १० का विद्यालयका उत्कृष्ट नतिजा ल्याउने विद्यार्थीलाई पुरस्कृत गरेको छ । समाजले यसइइ परीक्षा २०७९ मा उत्कृष्ट नतिजा ल्याउने विद्यार्थीलाई नगद सहित प्रशंसा-पत्रबाट सम्मान गरेको हो ।

समाजले तीनवटै वडाहरूमा रहेका पाँचवटा विद्यालयका दलित समुदायका उत्कृष्ट विद्यार्थी १ जना र उत्कृष्ट छात्रा १ जना गरी ७ जना विद्यार्थीलाई सम्मान गरेको छ । त्यसैगरी एशियन चित्रकला डायरी प्रतियोगितामा उत्कृष्ट (प्रथम) हुने निर्जला आविका विनायक नेपालीलाई पनि सम्मान गरिएको छ ।

भानुका नगर शिक्षा अधिकारी ध्रुवराज पौडेलले पुरस्कार प्रदान गर्दै शैक्षिक क्षेत्रमा राम्रो नतिजा ल्याउने विद्यार्थीलाई सम्मान र हौसला बढाइ अझ राम्रो गर्नका लागि प्रेरणा जगाउने बताए । उनले भने, ‘पूर्कोट सेवा समाजले सेवाक्षेत्रका विद्यालय र विद्यार्थीलाई पुरस्कृत गरी शैक्षिक उन्नयनमा टेवा पुर्‍याउनुका साथै समाजले विपद व्यवस्थापन र सामाजिक सेवाको क्षेत्रमा पनि अनुकरणीय कार्य गरेको छ ।’

पुर्कोट क्षेत्रबाट वैदेशिक रोजगारमा गएका युवाहरूबाट संकलन गरिएको ७ लाख रुपैयाँको कोषबाट शुरू गरिएको सामाजिक अभियान हाल शिक्षा, स्वास्थ्य, विपद, एम्बुलेन्स सेवा तथा अन्य विभिन्न सामाजिक कार्यक्रममा सहयोग पुर्याउँदै आएको समाजका अध्यक्ष बासुराज कडरियाले बताए ।

समाजका अध्यक्ष बासुराज कडरियाको अध्यक्षता आयोजित पुरस्कार वितरण कार्यक्रममा भानु-९ का वडाध्यक्ष मीनबहादुर गुरूङ, कर्मदा माविका सहायक प्रधानाध्यापक तथा समाजका आजीवन सदस्य रिदय भट्ट लगायतको उपस्थिति रहेको थिया ।

सेयर गर्नुहोस्

प्रतिक्रिया दिनुहोस्

सम्बन्धित खवर