आर्थिक वर्ष ०७८/७९ मा चार पक्की पुल निर्माण सम्पन्न
भञ्ज्याङ समाचारदाता/दमौली
पूर्वाधार विकास कार्यालयमार्फत आर्थिक वर्ष ०७८/७९ मा चार पक्की पुल निर्माण सम्पन्न भएका छन् । जिल्लाका विभिन्न ठाउँमा करिब रु १६ करोड बराबरका ती पक्की पुल निर्माण सम्पन्न भएका हुन् ।
विभिन्न मितिमा निर्माण सुरु भएका उक्त पुल आर्थिक वर्ष ०७८/७९ मा निर्माण सम्पन्न भएको कार्यालयले जनाएको छ । कार्यालयले रिस्तीखोला मोटरेबल पुल सोतीबेँसी, बुडुवाखोला मोटरेबल पुल, फेदीखोला मोटरेबल पुल र रिस्तीखोला मोटरेबल पुल बगुवा निर्माण सम्पन्न गरेको कार्यालयका सूचना अधिकारी धनमाया मिश्रले बताइन् ।
फेदीखोला मोटरेबल पुल रु चार करोड २८ लाख ३२ हजार, बुडुवा खोला पुल रु दुइ करोड नौ लाख, रिस्ती बगुवाखोला पुल रु चार करोड २५ लाख र रिस्ती सोतीबेँसीको पुल रु चार करोड ७१ लाख ३६ हजारको लागतमा सम्पन्न भएको हो ।
फेदी खोलामा २५ मिटर, बुडुवा खोलामा १९ दशमलव आठ मिटर, रिस्ती बगुवा ५२ मिटर र सोतीबेँसीमा ४१ मिटर लामो स्पान टाइपको मोटरेबल पुल निर्माण भएको मिश्रले बताइन् । उक्त आर्थिक वर्षमा सातवटा पुल सम्पन्न गर्ने लक्ष्य राखिए पनि जेठ र असारमा वर्षाका कारण काम गर्न कठिनाइ भएपछि तीनवटा पुल निर्माण सम्पन्न हुन नसकेको उनले बताइन् ।
उनले भनिन्, “सातवटा पुल सम्पन्न हुन्छ भन्ने लक्ष्य थियो, तर तीनवटा पुलको काममा ढिलाइ भयो, चारवटा मात्रै सम्पन्न भएको छ ।” करिब रु ११ करोडको लागतमा निर्माण सम्पन्न हुने तीन पुलहरू अन्तिम चरणमा पुगेको छ । ज्वालाखोला मोटरेबल पुल रु तीन करोड २१ लाख, द्रोपद खोला मोटरेबल पुल रु तीन करोड ८३ लाख र बरखोला पुल रु तीन करोड ३६ लाखको लागतमा निर्माण भइरहेको कार्यालयले जनाएको छ ।
कार्यालयले आवमा ६४ प्रतिशत वित्तीय प्रगति हासिल गरेको छ । उक्त वर्ष रु एक अर्ब ३१ करोड सात हजार ४० विनियोजन भएकामा रु ८४ करोड ७६ लाख १४ हजार खर्च भएको जनाइएको छ । पूँजीगततर्फ कूल रु एक अर्ब २८ करोड ६२ लाख ८२ हजार विनियोजन भएकामा रु ८३ करोड ३४ लाख पाँच हजार खर्च भएको कार्यालयले जनाएको छ । चालुतर्फ विनियोजित रु दुइ करोड ४४ लाख ५८ हजारमध्ये रु एक करोड ४२ लाख नौ हजार खर्च भएको छ ।
आवको मसान्तको समयमा विकास निर्माणको काम गर्ने प्रवृत्तिका कारण कार्यालयले विकास बजेट सोचे अनुरुपको खर्च गर्न नसकेको हो । मिश्रले भनिन्, “जेठ असारमा पानी परेर काम हुन नसकेपछि लक्ष्य अनुसारको प्रगति हासिल हुन सकेन ।”
