तनहुँको भानुमा मोटरसाइकल दुर्घटना हुँदा दुई जनाको मृत्यु
तनहुँ : तनहुँको भानु नगरपालिका–१० तल्लो मैदानमा मोटरसाइकल दुर्घटना हुँदा दुई जनाको मृत्यु भएको छ ।
आज बिहान करिब ९ः४५ बजे हटियाबाट चिसापानीतर्फ जाँदै गरेको ग १९ प ८०६५ नम्बरको मोटरसाइकल हटिया–चिसापानी भित्री सडकखण्डमा चालकले नियन्त्रण गुमाउँदा सडकबाट करिब १० मिटर तल खसेको थियो ।
दुर्घटनामा मोटरसाइकल चालक भानु नगरपालिका–१० तल्लो मैदानका करिब ४५ वर्षीय शंकर पाण्डे र मोटरसाइकलको पछाडि सवार सोही स्थानका ६५ वर्षीय टंकनिती पाण्डे घाइते भएका थिए ।
घाइते दुवैलाई तत्काल उद्धार गरी उपचारका लागि पठाइएकोमा उपचारका क्रममा दुवै जनाको मृत्यु भएको प्रहरीले जनाएको छ । शंकर पाण्डेलाई पुरानो मेडिकल कलेज भरतपुर, चितवन र टंकनिती पाण्डेलाई प्रदेश अस्पताल बेँसीशहर, लमजुङ पठाइएको थियो ।
घटनाबारे थप अनुसन्धान भइरहेको तनहुँ प्रहरीले जनाएको छ ।
