१४८औं विश्व हुलाक दिवस मनाइयो
भञ्ज्याङ समाचारदाता/दमौली
जिल्ला हुलाक कार्यालय तनहुँले विविध कार्यक्रम गरी १४८औं विश्व हुलाक दिवस मनाएको छ । ‘पोष्ट फर प्लानेट’ भन्ने नाराका साथ कार्यालयले असोज २३ देखि २५ गतेसम्म विविध कार्यक्रम गरी हुलाक दिवस मनाइएको हो ।
दिवसका अवसरमा कार्यालयले वार्षिक कर्मचारी तथा सेवाग्राही सम्मान, कार्यालय परिसर सरसफाई लगायतका विविध कार्यक्रम गरिएको कार्यालयले जनाएको छ । जिल्ला, इलाका तथा अतिरिक्त हुलाकका कर्मचारी समेतको सहभागिता रहेको नायब सुब्बा तथा सूचना अधिकारी सचिन पौडेलले जानकारी गराए ।
कार्यक्रममा ३ वटै स्तरका हुलाकबाट १/१ जना क्रमशः जिल्ला हुलाकका हल्कारा राजेशबहादुर कुमाल, टुहुरेपसल इलाका हुलाकका हल्कारा लक्ष्मण अधिकारी तथा पोखरीभञ्ज्याङ्ग अतिरिक्त हुलाकका हुलाक प्रतिनिधि पार्वती थापा जोशीलाई जनही नगद १/१ हजार रुपैयाँ, सम्मानपत्र प्रदान गरी सम्मान गरिएको थियो ।
दिवसका अवसरमा आयोजित घैंटो फुटाइ लगायतका मनोरञ्जनात्मक कार्यक्रममा विजयीलाई हुलाक अधिकृत मित्रलाल भट्टराइले पुरस्कृत गरेका थिए ।
