तनहुँमा धान खेतीको क्षेत्रफल र उत्पादन घट्दो, उत्पादित धान पनि बिक्री भएन

तनहुँमा धान खेतीको क्षेत्रफल र उत्पादन घट्दै गएको छ । धान खेतीतर्फ कृषकको आकर्षण घट्दै गएकाले जिल्लामा वर्षेनी धान उत्पादन घट्दै गएको हो ।

पछिल्लो एक दशकयता जिल्लामा वर्षे, चैते र घैय्या धानको खेती र क्षेत्रफल घट्दो अवस्थामा रहेको कृषि ज्ञान केन्द्रका प्रमुख कुलप्रसाद तिवारीले बताए । ‘कृषकहरुले पुरानो बीउ प्रयोग गरिरहेका कारण पनि धान उत्पादन घट्दो क्रममा रहेको छ’, उनले भने, ‘पुरानो बीउ प्रतिस्थापन गर्न सकिए धान उत्पादन बढाउन सकिने र यसतर्फ कार्यालयले सोच पनि बनाएको छ ।’

‘वर्षो धान विक्री नभएकाले धानखेतीतर्फ कृषकको आकर्षण घटेको छ’, उनले भने, ‘कृषकहरुले आफुले उत्पादन गरेको धान बिक्री हुन सकिरहेको छैन, कृषकले यत्तिकै थन्काएर राख्नुपर्ने अवस्था छ । बिक्री नै नभएपछि यसतर्फ आकर्षण पनि बढाउन सकिएको छैन ।’

पछिल्लो एक दशकयता जिल्लामा वर्षे, चैते र घैय्या धान उत्पादन घट्दो अवस्थामा छ । वि.सं. २०६० मा ३५ हजार ७८६ मेट्रिक टन वर्षे धान उत्पादन भएकामा विसं २०७९ मा ३३ हजार २८० मेट्रिक टन धान उत्पादन भएको थियो । त्यतिबेला १२ हजार ३४० हेक्टर जमिनमा वर्षो धान खेती हुने गरेकामा अहिले घटेर आठ हजार ३२० हेक्टर जमिनमा धान खेती भइरहेको केन्द्रले जनाएको छ ।

त्यस अवधिमा वर्षे धान खेती गरिएको चार हजार २० हेक्टर जमिन घटानका साथै दुइ हजार ५०६ मेटि्रक टन धान उत्पादनमा कमी आएको छ । विसं २०६० मा ११ हजार ७८० मेट्रिक टन चैते धान उत्पादन भएकामा विसं २०७९ मा सात हजार ९३८ मेट्रिक टन उत्पादन भएको थियो । त्यतिबेला तीन हजार ८०० हेक्टर जमिनमा चैते धान खेती हुने गरेकामा अहिले घटेर एक हजार ८९० हेक्टर क्षेत्रफलमा मात्रै सीमित भएको छ ।

विसं २०६० मा आठ हजार १९४ मेट्रिक टन धान उत्पादन भएकामा विसं २०७९ मा २५ मेट्रिक टन मात्रै धान उत्पादन भएको छ । त्यतिबेला तीन हजार ९०२ हेक्टर क्षेत्रफलमा घैय्या धान खेती हुने गरेकामा अहिले घटेर दश हेक्टर जमिनमा मात्रै उक्त खेती भइरहेको छ । यस अवधिमा घैय्या धान खेती गर्ने क्षेत्रफल तीन हजार ८९२ हेक्टरले घटेको छ भने उत्पादन पनि घटेर आठ हजार १६९ मेट्रिक टन भएको छ ।

प्रमुख तिवारीका अनुसार कार्यालयले चैते धानलाई विशेष जोड दिएर कार्यक्रम सञ्चालन गर्न लागेको छ । चैते धानतर्फ कृषकको आकर्षण बढाउन चालु आर्थिक वर्षमा कार्यक्रम सञ्चालन गरिने उनले बताए । यसका लागि कार्यालयले हाइब्रिड बीउ, हाते ट्रयाक्टर, धान उत्पादनमा प्रोत्साहन वितरणलगायत कार्यक्रम ल्याएको छ ।

आर्थिक वर्ष २०७९/०८० मा कार्यालयले चैते धान प्रवर्द्धनका लागि रु ५० लाख बजेट विनियोजन गरेको थियो । चालु आर्थिक वर्षमा त्यसलाई बढाएर रु एक करोड ५० लाख पुर्‍याइएको छ । प्रमुख तिवारीले भने, ‘यो वर्ष चैते धानलाई विशेष जोड दिएर कार्यक्रम सञ्चालन गरिने र यसका लागि रु एक करोड बजेट वृद्धि भएको छ ।’

गत आर्थिक वर्षमा चैते धान प्रवर्द्धन कार्यक्रममार्फत दश वटा समूहलाई दुइ हजार पाँच सय केजी हाइब्रिड बीउ वितरण गरिएको र त्यसका लागि रु ४३ लाख ५९ हजार खर्च भएको थियो । त्यस्तै १६ हजार १२ केजी उन्नत बीउ, २५ वटा हाते ट्रयाक्टर, ३४ वटा मिलका साथै धान उत्पादनमा रु छ लाख प्रोत्साहन रकम उपलब्ध गराइएको थियो ।

चालु आर्थिक वर्षमा चैते धानको बीउ प्रतिस्थापन, उन्नत र हाइब्रिड बीउ प्रयोगमा जोड, उपकरणको प्रयोग, चैते धान सुकाउने उपकरण, धान काट्ने उपकरण वितरण, कुलो निर्माण र मर्मत, चामल मिलको स्तरोन्नति र चैते धानको बजारीकरणमा सहयोग गरिने प्रमुख तिवारीले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर