तनहुँको भानु र बेथानचोक पालिका बीच अनुभव आदानप्रदान

तनहुँको भानु नगरपालिका र काभ्रेको बेथानचोक गाउँपालिका बीच अनुभव आदानप्रदान गरिएको छ । वेथानचोक गाउँपालिकाका अध्यक्ष भगवान अधिकारीको नेतृत्वमा आएको टोली र भानु नगरपालिकाले स्थानीय तहको कार्यसम्पादन सम्बन्धमा अनुभव आदानप्रदान गरेका थिए ।

यस अवसरमा भानु नगरपालिकाका प्रमुख अनन्दराज त्रिपाठी, उपप्रमुख उमा गोतामे, प्रमुख प्रशासकीय अधिकृत दीवाकार पौडेलले भानुको पहिचान भानुभक्तीय विर्केटोपी लगाएर स्वागत एवं सम्मान गरेका थिए । स्थानीय तहले अंगीकार गरेका केही असल अभ्यासहरूका बारेमा दुबै तर्फबाट प्रस्तुतीकरण गरिएको थियो ।

भानुका नगर शिक्षा अधिकारी ध्रुवराज पौडेलले भानुका शिक्षा क्षेत्रमा गरिएका केही प्रयास तथा असल अभ्यासका बारेमा प्रस्तुतीकरण गरेका थिए । अनुभव आदानप्रदानको क्रममा दुबै तर्फका प्रयासहरू मध्ये धेरै कुरामा समानता देखिएको शिक्षा अधिकारी पौडेलले जानकारी गराए ।

यस्तै, बेथानचोक गाउँपालिकाले प्रत्येक वर्ष कम्तिमा ५ किलोमिटर पक्की सडक अनिवार्य रूपमा बनाउने घोषणा, कृषि पकेट क्षेत्रमा अनुदान र पशु तथा दुग्ध व्यवसायमा आत्मनिर्भर हुने नीति र कार्यक्रम अनुकरणीय रहेको थियो ।

यसरी अन्तर स्थानीय तह बीच हुने अन्तरक्रिया र अवलोकन भ्रमणबाट अरू तहहरूले गरेका असल अभ्यासहरूका बारेमा जानकारी लिई यसलाई आफ्नो पालिकामा पनि लागू गराउनका लागि अनुदान आदनप्रदान संस्कृति उपलब्धिमुलक हुने नगरप्रमुख त्रिपाठीले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर