तनहुँमा डेंगु संक्रमण बढ्दो

तनहुँमा डेंगु संक्रमण बढ्द गएको छ । पछिल्लो तथ्याङ्क अनुसार तनहुँमा ७३२ जनामा डेंगु संक्रमण पुष्टि भएको छ । साउन महिनायता जिल्लाका विभिन्न ठाउँका ७३२ जनामा डेंगु संक्रमण पुष्टि भएको हो । यस्तै, डेंगु संक्रमणबाट एक जनाको मृत्यु भएको स्वास्थ्य कार्यालयले जनाएको छ । व्यास नगरपालिकामा कार्यरत इन्जिनियर कमलप्रसाद शर्माको डेंगुबाट मृत्यु भएको कार्यालयले जनाएको छ ।

स्वास्थ्य कार्यालयका प्रमुख शङ्करबाबु अधिकारीले जिल्लामा डेंगुको जोखिम रहेकाले सतर्कता अपनाउन आग्रह गरे । अधिकारीले डेंगु संक्रमण परीक्षणका लागि दमौली अस्पतालमा किट पर्याप्त मात्रामा रहेको बताए । गत वर्ष जिल्लामा डेंगुबाट संक्रमित हुनेको संख्या एक सयभन्दा बढी थियो ।

लामखुट्टेको टोकाइबाट डेङ्गु हुने भएकाले लामखुट्टेको टोकाइबाट जोगिन आवश्यक रहेको अधिकारीले बताए । डेंगुबाट संक्रमित लामखुट्टेको टोकाइले यो रोग र्सदछ । आजभोलि डेंगु ज्वरो नेपालका विभिन्न भागमा देखा परिरहेको छ । यो लामखुट्टेले विशेषगरी दिउँसो मात्र टोक्ने गर्दछ र बर्सातको मौसम सुरु भएपछि डेंगु ज्वरोको प्रकोप बढ्न थाल्दछ ।

एक्कासि तीनदेखि पाँच दिनसम्म ज्वरो आउनु यसको मुख्य लक्षण हो । यसरी आएको ज्वरो पाँचदेखि सात दिनसम्म रहिरहन सक्दछ । यसका साथै बेस्सरी टाउको दुख्नु, आँखाको गेडी दुख्नु, शरीरमा डाबर आउनु, खाना अरुचि हुनु, जोर्नी तथा मांसपेशी बेस्सरी दुख्नु, पेट तथा आन्द्रामा गडबडी हुनु पनि डेंगुका लक्षण हुन् ।

चिकित्सकका अनुसार डेंगुबाट बच्नका लागि मुख्यतया लामखुट्टेको टोकाइबाट जोगिनु पर्दछ । पूरा शरीर ढाकिने गरी कपडा लगाउनु, लामखुट्टेको टोकाइबाट बच्न मल्हम जस्ता सामग्री प्रयोग गर्नु, सँधै राति र दिउँसो पनि झूलभित्र सुत्ने, घरवरपर खेतबारीमा काम गर्न जाँदा लामखुट्टेको टोकाइबाट बच्न ध्यान पुर्‍याउनु यसबाट बच्ने प्रमुख उपाय हुन् ।

सेयर गर्नुहोस्

प्रतिक्रिया दिनुहोस्

सम्बन्धित खवर