प्रेस चौतारी नेपालको २६औं स्थापना दिवस, न्यौपानेलाई प्रेस चौतारी क्रियाशील पुरस्कार
भञ्ज्याङन्यूज
प्रेस चौतारी नेपालले सोमबार विविध कार्यक्रम गरी २६औं स्थापना दिवस मनाएको छ । प्रेस चौतारी नेपाल तनहुँले स्थापना विदसका अवसरमा ज्येष्ठ नागरिक आश्रममा फलफूल वितरण गरेको छ । शाखाले व्यास-५ स्थित ज्येष्ठ नागरिक आश्रममा फलफूल वितरण गरेको हो ।
प्रेस चौतारी नेपालका केन्द्रीय निर्वाचन आयोग सदस्य नारायण खड्का, तनहुँ शाखाका पूर्व अध्यक्ष त्रिभुवन श्रेष्ठ, अध्यक्ष राजकुमार श्रेष्ठ विविले संयुक्त रुपमा आश्रमलाई फलफूल हस्तान्तरण गरेका थिए ।
राष्ट्रिय परोपकार महासंघ तनहुँका अध्यक्ष तारानाथ घिमिरेलाई फलफूल हस्तान्तरण गर्दै वक्ताहरुले श्रमजीवि पत्रकारको ठूलो संगठन प्रेस चौतारी भएको चर्चा गरेका थिए । यस्तै, सहयोगप्रति आश्रमका अध्यक्ष घिमिरेले आभार व्यक्त गरेका थिए ।
यस्तै, प्रेस चौतारी नेपाल तनहुँ शाखामा स्थापित क्रियाशील पत्रकारिता पत्रकार कृष्ण न्यौपानेलाई प्रदान गरिने भएको छ । २६औं स्थापना दिवसका अवसरमा शाखाको सोमबार बसेको बैठकले न्यौपानेलाई उक्त पुरस्कार प्रदान गर्ने निर्णय गरेको हो ।
उक्त पुरस्कार विश्व प्रेस स्वतन्त्रता दिवसका अवसरमा हुने कार्यक्रममा प्रदान गर्ने निर्णय भएको शाखा अध्यक्ष राजकुमार श्रेष्ठले बताए । पुरस्कारको राशी दश हजार रहेको छ ।
पत्रकारिता क्षेत्रमा पुर्याएको योगदानको कदर गर्दै न्यौपानेलाई उक्त पुरस्कार प्रदान गर्ने निर्णय गरिएको अध्यक्ष श्रेष्ठले बताए । प्रेस चौतारी तनहुँका उपाध्यक्ष न्यौपाने खबरपुञ्ज डटकमका कार्यकारी सम्पादक हुनभने राष्ट्रिय समाचार समिति (रासस)मा पनि कार्यरत छन् ।
प्रेस चौतारीले मरेर बाँचेकाहरु र अन्तिम सन्देश नामक वृत्तचित्र प्रदर्शन गरेर बेचेको रकमबाट एक लाख रुपैयाँको पत्रकारिता अक्षयकोष स्थापना गरेको छ । उक्त कोषको व्याजबाट प्रत्येक वर्ष एक जना क्रियाशील पत्रकारलाई पुरस्कार प्रदान गर्दै आएको छ । यसअघि उक्त पुरस्कारबाट शाखाका पूर्व अध्यक्ष प्रेमप्रसाद पौडेल, प्रकाशचन्द्र भट्टर्राई, बसन्ती बास्तोला, नारायण खड्का पुरस्कृत भइसकेका छन्।
