तनहुँको आँवुखैरेनीमा भूमिहीन ३८ परिवारको विवरण प्रमाणित, लालपूर्जा वितरण प्रक्रिया अघि बढ्यो
आँवुखैरेनी : तनहुँको आँबुखैरेनी गाउँपालिकाले भूमिहीन सुकुम्बासीलाई लालपूर्जा उपलब्ध गराउने प्रक्रियालाई अघि बढाउँदै वडा नं. १ देखि ६ सम्मका ३८ परिवारको विवरण प्रमाणित गरेको छ । गाउँकार्यपालिकाको साउन १ गते बसेको बैठकले ३८ जना भूमिहीन सुकुम्बासी परिवारको विवरण प्रमाणित गर्दै लालपूर्जा वितरणका लागि आवश्यक प्रक्रिया अगाडि बढाउन भूमि समस्या समाधान समिति तनहुँमा विवरण पठाउने निर्णय गरेको हो ।
गाउँपालिकाका अनुसार अब भूमि समस्या समाधान समितिबाट आवश्यक कानुनी तथा प्राविधिक प्रक्रिया पूरा भएपछि प्रमाणित भएका परिवारलाई धनीपुर्जा वितरणको प्रक्रिया अघि बढाइनेछ । लामो समयदेखि भूमिको स्वामित्वबाट वञ्चित रहेका नागरिकलाई कानुनी रूपमा जग्गाको स्वामित्व प्रदान गर्ने उद्देश्यले यो प्रक्रिया अघि बढाइएको गाउँपालिकाले जनाएको छ ।
गाउँपालिका अध्यक्ष शुक्र चुमानले भूमिहीन परिवारलाई सम्पत्ति अधिकार, सम्मानजनक जीवन र सुरक्षित भविष्य सुनिश्चित गर्ने प्रतिबद्धताअनुसार गाउँपालिका कार्यरत रहेको बताए । उनले ‘भूमिहीनको हातमा धनीपुर्जा, समतामूलक समाजको ऊर्जा’ भन्ने नीतिअनुसार सबै नागरिकको भूमि अधिकार सुनिश्चित गर्दै समावेशी विकास र समान अवसरको अभियानलाई प्राथमिकताका साथ कार्यान्वयन गरिएको उल्लेख गरे ।
भूमि स्वामित्वको अभावका कारण वर्षौंदेखि विभिन्न सरकारी सेवा, आर्थिक अवसर तथा सामाजिक सुरक्षाबाट वञ्चित रहेका नागरिकका लागि गाउँपालिकाको यो निर्णय महत्वपूर्ण उपलब्धिका रूपमा हेरिएको छ ।
गाउँपालिकाले पारदर्शी सेवा प्रवाह, नागरिकको भूमि अधिकार सुनिश्चित गर्ने तथा समृद्ध आँबुखैरेनी निर्माण गर्ने लक्ष्यका साथ भूमि व्यवस्थापनसम्बन्धी बाँकी प्रक्रियासमेत प्रभावकारी रूपमा अघि बढाइने जनाएको छ ।
